Azərbaycan, Bakı, 22 oktyabr /Trend, müxbir Səba Ağayeva/
Almaniyanın xarici işlər naziri Frank-Valter Ştaynmayer Bakıda Ermənistan-Azərbaycan, Dağlıq Qarabağ münaqişəsinin nizamlanması yollarını müzakirə edəcək.
Çərşənbə günü Ştaynmayer Qafqaz turnesinə başlayır. Səfər çərçivəsində o, Bakıda və Yerevanda da olacaq. Trend xəbər verir ki, bu barədə "Deutsche Welle" radiosi xəbər verib.
Məlumatda deyilir ki, bu səfər Avropa İttifaqının hətta Ukraynadakı böhran qarşısında belə "Şərq Tərəfdaşlığı" ölkələrinin problemlərini diqqətdən qaçırmadığını göstərir.
Oktyabrın 23-də Ştaynmayer Bakıya gələcək. Burada onun ölkənin rəsmi şəxsləri ilə görüşləri planlaşdırılıb. Sonra Almaniya XİN rəhbəri Yerevana gedəcək və Prezident Serj Sarkisyanla görüşəcək.