Azərbaycan, Bakı, 11 iyul /Trend/
Heydər Əliyev Fondunun dəstəyi və təşəbbüsü ilə Fransanın Kann şəhərində Azərbaycan mədəniyyəti günləri davam edir. Trend-in AzərTAc Dövlət İnformasiya Agentliyinə istinadən verdiyi məlumata görə, iyulun 10-da Kannda Festivallar və Konqreslər sarayında bir neçə sərgini özündə birləşdirən "Azərbaycan: ənənələrin və gələcəyin ölkəsi" sərgisinin açılış mərasimi olmuşdur.
Azərbaycanın birinci xanımı, Heydər Əliyev Fondunun prezidenti Mehriban Əliyeva mərasimdə iştirak etmişdir.
Tədbirdə çıxış edən Kannın Festivallar və Konqreslər sarayının direktoru Kler-Ann Reks bildirmişdir ki, artıq ikinci ildir Azərbaycan Kannda uğurlu təqdimatlarla çıxış edir və bu da şəhərin həyatında mühüm hadisə kimi qiymətləndirilir. Kler-Ann Reks şəhərə gələn çoxsaylı turistlərin də bu tədbirlərə böyük maraq göstərdiklərini qeyd etmişdir.
Sonra Heydər Əliyev Fondunun prezidenti Mehriban Əliyeva çıxış etmişdir.
Birinci xanımın sözlərinə görə, artıq iyirmi ildən çoxdur ki, Fransa ilə Azərbaycan arasında bütün sahələri əhatə edən əməkdaşlıq qurulub. Bu əməkdaşlıq ikitərəfli hörmət, dostluq və maraq əsasında qurulub və inkişaf edir: "Bu ilin may ayında Fransa Respublikasının Prezidenti cənab Fransua Ollandın ölkəmizə rəsmi səfəri çərçivəsində Azərbaycanın və Fransanın dövlət başçılarının görüşü bu əlaqələrin strateji xarakter daşıdığını bir daha təsdiqlədi. Mən bu kontekstdə keçən ay Fransada təsis olunmuş Azərbaycanın Dostları Assosiasiyasını qeyd etmək istərdim. Biz bu Assosiasiyanın yaradılmasını alqışlayırıq və dəstəkləyirik. Bu Assosiasiya öz ətrafına Azərbaycanın dostlarını toplamışdır. Assosiasiyanın üzvləri Azərbaycan həqiqətlərini Fransa ictimaiyyətinə çatdırırlar. Mən burada Assosiasiyanın sədri cənab Jan-Fransua Manseli salamlayıram və ona öz dərin minnətdarlığımı bildirirəm. Həmçinin Assosiasiyanın ən fəal üzvlərindən olan və Azərbaycanın əziz dostu xanım Rəşidə Datini görməyimə çox şadam. Ümidvaram ki, Assosiasiyanın üzvlərinin sayı artacaqdır. Mən sizin işinizə uğurlar arzulayıram".
Mehriban Əliyeva bildirib ki, eyni zamanda, Azərbaycan ilə Fransa arasında iqtisadi əlaqələr ildən-ilə möhkəmlənir: "Ölkələrimiz telekommunikasiya, şəhərsalma, nəqliyyat, yüngül sənaye, şərabçılıq və digər sahələrdə əməkdaşlıq qurmuşdur. Azərbaycanda 50-dən çox fransız şirkəti fəaliyyət göstərir və bu fəaliyyət ikitərəfli fayda gətirməkdədir. Azərbaycan Fransanın Cənubi Qafqazda əsas ticarət tərəfdaşıdır. Fransa ilə ticarət dövriyyəmiz iki milyard dollara yaxınlaşır.
Tarix boyu dilindən, dinindən asılı olmayaraq insanları, xalqları birləşdirən humanitar sahəyə biz böyük diqqətlə yanaşırıq. Mən çox şadam ki, son illər Fransa ilə Azərbaycan arasında humanitar əlaqələr tamamilə yeni səviyyəyə yüksəlmişdir. Bu gün Fransanın ali məktəblərində yüzlərlə azərbaycanlı tələbə təhsil alır, bir çox Fransa universitetlərində Azərbaycan dili və tarixi tədris olunur. Eyni zamanda, Azərbaycanın paytaxtı Bakıda fransız liseyi inşa olunmuş və fəaliyyət göstərir. Azərbaycan dövləti Luvr Muzeyinin İslam İncəsənəti Departamentinin yaradılmasında iştirak edib, Heydər Əliyev Fondunun səyləri ilə Strasburqun Kafedral kilsəsi, Fransanın digər rayonlarında tarixi və memarlıq abidələri bərpa olunub".
Birinci xanım bildirib ki, Heydər Əliyev Fondunun dəstəyi ilə Fransanın paytaxtında və iyirmi şəhərində Qafqazın mirvarisi olan Azərbaycanın mədəniyyətini təmsil edən sərgilər, konsertlər və digər tədbirlər keçirilib: "Parisdə dahi Azərbaycan şairləri Nizami Gəncəvi və Məhsəti Gəncəvinin həyat və yaradıcılığına həsr olunmuş elmi konfranslar keçirilib. Bu yaxınlarda Miluz şəhərinin Yuxarı Alzas Universitetinin filologiya fakültəsinin konfrans zalı Heydər Əliyev Fondunun dəstəyi ilə tamamilə yenidən qurulub və bu zala Məhsəti Gəncəvinin adı verilib. Əminəm ki, atılan bütün bu addımlar xalqlarımızı və ölkələrimizi biri-birinə daha yaxın edib, daha sıx dostluq əlaqələri yaradıb. Bu sırada keçən il Kann şəhərində keçirilən Azərbaycan mədəniyyəti günlərini xüsusi qeyd etmək istərdim. Mən çox şadam ki, Fransanın ən gözəl şəhərlərindən biri olan Kannda bizim bütün tədbirlərimiz böyük maraq və hörmətlə qarşılandı. Biz bu şəhərə ürəkdən bağlandıq və mədəniyyət günlərimizi ənənəvi olaraq hər il burada keçirmək istərdik.
Mən fürsətdən istifadə edərək, bizə yardım göstərən və bütün tədbirlərimizdə bizə dəstək verən hər bir insana, xüsusilə Kann şəhərinin keçmiş meri cənab Bernar Broşana və hazırkı meri cənab Devid Lisnarda dərin minnətdarlığımı çatdırıram.
Əziz qonaqlar, sonda bir daha sizin ölkənizə olan öz hörmətimi və məhəbbətimi çatdırır və sizə xoş axşam arzulayıram. İndi isə sizi sərgi ilə tanış olmağa dəvət edirəm".
Fransa Milli Assambleyasının üzvü, Azərbaycanın Dostları Assosiasiyasının sədri Jan-Fransua Monsel rəhbərlik etdiyi qurumun fəaliyyəti barədə məlumat vermişdir. Bildirmişdir ki, Assosiasiyanın üzvlərinin sayı getdikcə artır və bu da Fransada Azərbaycana olan maraqdan irəli gəlir. O, bu cür tədbirlərin ölkələrimiz arasında əlaqələrin daha da inkişafına xidmət etdiyini diqqətə çatdırmışdır.
Daha sonra sərgi ilə tanışlıq olmuşdur.
Heydər Əliyev Fondu yarandığı gündən xaricdə ölkəmizin qədim və zəngin tarixini, mədəniyyətini təbliğ etmək məqsədilə müxtəlif layihələr reallaşdırır. Hər il minlərlə turistin ziyarət etdiyi Kannda bir neçə sərgini özündə birləşdirən "Azərbaycan: ənənələrin və gələcəyin ölkəsi" sərgisinin açılışı da bu istiqamətdə Fondun atdığı növbəti addım olmuşdur.
Sərgidəki bölmələrdən birində rəssamlar Xalidə Səfərova və Kamil Nəcəfzadənin əsərləri təqdim olunur. 50-dən çox rəsm əsərinin toplandığı ekspozisiya Fransaya həsr edilmişdir. "Fransa Azərbaycan rəssamlarının gözü ilə" adlı bölmədəki əsərlərdə bu ölkə, onun regionları və paytaxtı Paris təsvir olunmuşdur. Burada fırça ustalarımız özlərinə məxsus bədii üslubda maraqlı sənət əsərlərini təqdim edirlər.
Sərgidə Azərbaycan xalçaçılıq məktəbinin bütün istiqamətləri, yaşı yüz illərlə ölçülən xalça və xalça məmulatlarının geniş çeşidi də təqdim olunur. Rəngbərəng ilmələrdən toxunan zərif, bənzərsiz naxışlarla bəzədilən xalçalar ilk baxışdan, sadəcə, gözəl əl işi kimi görünsə də, əslində, özündə bir dünyalıq sirr gizlədir. Hər naxışın, hər rəngin öz mənası, öz tarixçəsi var. Xalqımızın qürur mənbəyi olan, nəsillərdən-nəsillərə yadigar qalan xalçaçılıq sənəti həm də incəsənətimizin dünya mədəniyyətinə inteqrasiyasında bir vasitədir.
Azərbaycan mədəniyyəti günləri zamanı Kann şəhərinin sakinləri və çoxsaylı qonaqlar qədim misgərlik nümunələrimizlə də tanış olmaq imkanı əldə edirlər. Aparılan tədqiqatlar və həmin sənətin bu gün də sevilə-sevilə yaşadılması təsdiqləyir ki, Azərbaycanda qədim xalq sənət növlərindən biri olan misgərlik çox erkən dövrlərə təsadüf edir və ölkəmiz onun inkişaf edən mərkəzlərindən biri olmuşdur.
Arxeoloji qazıntılar zamanı tapılan keramika nümunələri də sərgini izləyənlər tərəfindən maraqla qarşılanmışdır.
Burada təqdim edilən milli geyimlərimiz də azərbaycanlıların maddi mədəniyyətini, onlara xas olan xüsusiyyətləri əks etdirir.
Sərginin qiymətli eksponatlarından olan milli musiqi alətlərimiz də auditoriya tərəfindən son dərəcə maraqla qarşılanmışdır. Qədim musiqi alətlərimiz xalqımızın tarixi, mədəniyyət və mənəviyyat abidəsidir.
Kannda Nizami Gəncəvinin 850 illik yubileyi münasibətilə Heydər Əliyev Fondunun müxtəlif ölkələrdə təşkil etdiyi sərgilərin davamı olaraq ayrıca bölmə məhz Azərbaycan ədəbiyyatının ən dahi nümayəndələrindən birinə həsr olunmuşdur. Dünya ədəbiyyatı xəzinəsinə daxil olan Nizami Gəncəvinin əsərləri bir çox xalqların dilinə tərcümə olunmuş, əsərlərinin nadir əlyazma nüsxələri müxtəlif şəhərlərin məşhur kitabxana, muzey və əlyazmaları fondlarında qiymətli incilər kimi qorunub saxlanılır.
Nizami Gəncəvinin əsərləri Mehriban Əliyevanın rəhbərlik etdiyi Heydər Əliyev Fondu tərəfindən yenidən nəşr olunmuşdur. Dünya ədəbiyyatının zənginləşməsinə dəyərli töhfələr verən mütəfəkkirin büstü də Romada Mehriban Əliyevanın iştirakı ilə açılmışdır.
Bundan əlavə, Kannda Heydər Əliyev Fondunun ölkəmizin və onun mədəniyyətinin təbliğinə xidmət edən kitab, buklet və digər müxtəlif nəşrləri də sərgilənmişdir.
İyulun 31-dək davam edəcək bu sərgilər 2013-2014-cü illərdə Fransanın regionlarında Azərbaycan tərəfindən təşkil olunan sərgilərin bir növ icmalı kimi dəyərləndirilir. Bu sərgi Azərbaycanın mədəniyyətini, tarixini, irsini tanıtmaq məqsədi daşıyır və bir daha təsdiqləyir ki, ölkəmizin beynəlxalq imicinin formalaşdırılması istiqamətində son illərdə həyata keçirilən fəaliyyət proqramı artıq öz bəhrələrini verir.
Sonra Kannın Festivallar və Konqreslər Sarayında xalq artisti Teymur Göyçayevin dirijorluğu ilə Qara Qarayev adına Dövlət kamera orkestrinin konserti olmuşdur.
Yenə də Azərbaycan mədəniyyəti Fransanın Kann şəhərinin sakinlərinin qəlblərini fəth etmişdir. Bu son dərəcə maraqlı konsert proqramı özlüyündə təsdiq etdi ki, bu gün Azərbaycan mədəniyyətinin nadir incilərinin sorağı mötəbər mərasimlərdən gəlir. Bu da ilk növbədə, Azərbaycan dövlətinin mədəni irsimizə olan münasibətinin nəticəsidir. Heydər Əliyev Fondunun Azərbaycan mədəniyyətinin təbliğində oynadığı rol da əvəzolunmazdır.
Bu konsert Azərbaycanın zəngin musiqi xəzinəsinə malik olduğunu bir daha nümayiş etdirdi. Azərbaycan mədəniyyəti günlərinin Fransanın Kann şəhərində keçirilməsi bu ölkənin ictimai dairələrində Azərbaycan haqqında informasiya bolluğu yaratmaq baxımından da mühüm rol oynadı. Bu missiyanı isə öz möhtəşəm layihələri ilə Azərbaycanın ictimai-mədəni həyatında mühüm rol oynayan Heydər Əliyev Fondu uğurla həyata keçirir.
