Azərbaycan, Bakı, 1 sentyabr /Trend, müxbir İlkin İzzət/
Avropa Şurası Nazirlər Komitəsinin İnsan hüquqları üzrə Məruzəçi Qrupunun sədri Azərbaycandakı dini vəziyyətdən razı qaldığını deyib.
Avropa Şurası Nazirlər Komitəsinin İnsan hüquqları üzrə Məruzəçi Qrupunun sədri, Slovakiya Respublikasının AŞ-dəki daimi nümayəndəsi səfir Drahoslav Stefanek Trend-ə bildirib ki, Azərbaycanda dini azadlıqlara yüksək zəmanət verilir: "Burada bütün dinlərin nümayəndələri üçün bərabər, yaxşı şərait yaradılıb".
D.Stefanek Bakıda "Mədəniyyətlərarası dialoq: mədəniyyət və din arasında qarşılıqlı əlaqə" mövzusunda 2014-cü il mədəniyyətlərarası dialoqun dini ölçüsü üzrə Avropa Şurasının mübadilə görüşünün keçirilməsini də yüksək qiymətləndirib: "Bugünkü tədbir müxtəlif dinlər arasında dialoqun inkişafına mühüm töhfə verəcək. Burada bir çox dinlərin, dini icmaların nümayəndələri iştirak edirlər. Bu, çox gözəl fürsətdir ki, dinlər arasındakı uzunmüddətli əməkdaşlığı müzakirə edək".