Azərbaycan, Bakı, 22 oktyabr / Trend , müxbir A.Hüseynbala/
Azərbaycanın müxalifət partiyasının sədri Müsavat Partiyasını "Qarabağ və Respublika Uğrunda Hərəkat"ın daha tez dağılmasına cəhddə ittiham edib.
"Müsavat Partiyası xeyli vaxtdır hərəkatın daha tez və sürətlə dağılmasına yönələn siyasətini davam etdirir", - cümə axşamı Trend -a "Qarabağ və Respublika Uğrunda Hərəkat"da təmsil olunan Azərbaycan Demokrat Partiyasının (ADP) sədri Sərdar Cəlaloğlu bildirib.
Trend -un arayışı: "Qarabağ və Respublika Uğrunda Hərəkat"da təmsil olunan Müsavat Partiyası Ümid Partiyasının seçki komissiyalarındakı üzvlərinin geri çağırılmasını tələb edir. Ümid Partiyası isə Müsavat deputat qrupunun üzvlərinin mandatlarından imtina edəcəkləri təqdirdə tələbin yerinə yetirələcəyini bəyan edib. Hər iki partiya arasında yaranan bu gərginlik hərəkat daxilində ciddi böhrana səbəb olub.
Cəlaloğlunun sözlərinə görə, hərəkatın fəaliyyətinə xitam verilməsi ilə bağlı təsisçilərin ümumi qərarı olmayıb. "Əgər belə bir qərar yoxdursa, Müsavat Partiyası Mərkəzi İcra Aparatının rəhbəri Arif Hacılının hərəkatın mövcud olmaması ilə bağlı açıqlama verməsi məntiqsizdir", - partiya sədri əlavə edib.
Onun fikrincə, hərəkatın gələcək taleyi ilə bağlı məsələ "Azadlıq" blokundan asılıdır. "Amma ötən müddətdə bu blokda təmsil olunan partiyaların ümumi mövqeyi açıqlanmayıb. Buna baxmayaraq Müsavat Partiyası hərəkatla bağlı öz istəklərinə uyğun fikirlər səsləndirməkdə davam edir", - Cəlaloğlu vurğulayıb.
ADP sədri deyib ki, Müsavat Partiyası son illər müxalifətin təsis etdiyi birlikləri dağıtmaqda xüsusi rol oynayır. "Bu dəfə də həmin missiyanı özlərinə məxsus yerinə yetirilər. Əslində Müsavatın bu addımını normal qarşılamaq lazımdır", - Cəlaloğlu qeyd edib.
Müsavat Partiyası Mərkəzi İcra Aparatının rəhbəri Arif Hacılı bu gün mətbuata açıqlamasında "Qarabağ və Respublika Uğrunda Hərəkat"ın artıq mövcud olmadığını bəyan edib.
"Qarabağ və Respublika Uğrunda Hərəkat"ı Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları 2009-cu il martın 18-də Konstitusiyaya təklif olunan əlavə və dəyişikliklərlə bağlı keçirilən referendum ərəfəsi təsis ediblər.
Məqalə müəllifi ilə əlaqə ünvanı: [email protected]
