Azərbaycan, Bakı, 08 fevral, / Trend , müxbir A.Hüseynbala/
Azərbaycanın müxalifət partiyalarının təmsil olunduğu ittifaq parlament seçkilərində əməkdaşlıqla bağlı təklifini geri götürə bilər.
"Azadlıq" bloku və Müsavat Partiyası təklifimizə reaksiya vermədiyindən, biz parlament seçkilərinə öz imkanlarımız daxilində hazırlaşmalıyıq", - bazar ertəsi Trend -a Demokratiya Uğrunda İttifaqda (DUİ) təmsil olunan millət vəkili Pənah Hüseyn bildirib.
Trend -un arayışı: Azərbaycanda parlament seçkilərinin 2010-cu ilin payızında keçiriləcəyi gözlənilir. Bundan əvvəlki seçkilər 2005-ci ilin noyabr ayında keçirilib. Azərbaycanda parlament seçkiləri majoritar sistem üzrə 125 seçki dairəsində keçirilir.
Demokratiya Uğrunda İttifaq yanvar ayında "Azadlıq" blokuna və Müsavat Partiyasına parlament seçkilərinə hazırlıqla bağlı birgə müzakirələrin keçirilməsini təklif edib.
Hüseynin sözlərinə görə, DUİ-nin Sədrlər Şurasının bu gün keçirilən iclasında təklifi qəbul olunmasa da, "Azadlıq" bloku ilə Müsavat Partiyasının müxalifətin əməkdaşlığına laqeyd yanaşması danılmaz faktdır.
"İclasda onu da demişəm ki, DUİ adından təklifimizi geri götürməklə yanaşı, müxalifətin əməkdaşlıq məsələsi gündəmə gələrsə, yenidən müzakirələrdə iştirak etməyə hazırıq", - o əlavə edib.
Millət vəkili deyib ki, artıq bütün diqqəti ittifaqda təmsil olunan partiyaların seçkilərə hazırlığına yönəltmək lazımdır. "Bunu nəzərə alaraq, iclasda DUİ-yə daxil olan partiyaların rəhbərliyinin deputatlığa namizədlikləri nəzərdə tutulan insanlarla birgə müşavirəsinin keçirilməsi haqqında qərar qəbul olunub. Biz seçki qərargahı da yaratmışıq. Düşünürəm ki, işimizi bu istiqamətdə qurmalıyıq", - Hüseyn qeyd edib.
Onun fikrincə, müxalifətin parlament seçkilərində ciddi əməkdaşlıq etməsi ilə bağlı çox mühüm şans əldən verilməkdədir. "Doğrudur, nəzəri cəhətdən müxalifətin birliyi üçün ümidlər qalır. Lakin çox təəssüf ki, son dövrlərdə gedən proseslər göstərir ki, müxalifətin müəyyən nüfuzlu bir hissəsinin "enerjisi və resursları" tamamilə lazım olmayan istiqamətə sərf olunur", - Hüseyn xatırladıb.
Dеmоkrаtiyа Uğrunda İttifаqı 2005-ci il parlamеnt seçkisindən sonra müxalifətçi Klassik Xalq Cəbhəsi, Azadlıq və Milli Demokrat partiyaları yаrаdıb. 2008-ci il sеntyаbrın əvvəllərində Böyük Azərbаycаn, nоyаbr аyındа isə Хаlq pаrtiyаlаrı DUİ-yə üzv qəbul оlunub. İttifаq bu pаrtiyaların məşvərət və əməkdaşlıq qurumudur. 2009-ci ilin oktyabr ayında Milli Demokrat Partiyası DUİ-dən çıxarılıb və Milli Qurtuluş Partiyasının quruma üzv qəbul olunması haqqında qərar verilib.
Məqalə müəllifi ilə əlaqə ünvanı: [email protected]
