Azərbaycan, Bakı, 8 aprel /Trend, müxbir İ.İsabalayeva/
Azərbaycan Milli Elmlər Akademiyasının aprelin 24-də keçiriləcək ümumi yığıncağında qurumun prezidenti vəzifəsinə seçki keçiriləcək. Bu barədə Trend-ə AMEA-nın akademik katibi Vaqif Fərzəliyev məlumat verib.
Onun sözlərinə görə, həmin gün həm də AMEA-nın Rəyasət Heyətinin üzvləri seçiləcək. Bununla yanaşı, AMEA-nın illik hesabatı da ümumi yığıncağın gündəliyinə daxil edilib.
"Seçkinin nəticələrinin nə zaman bilinəcəyi gedişatdan asılı olacaq. Adətən, bir gün ərzində bu prosedurların hamısı keçirilir", - katib deyib.
O, əlavə edib ki, prezident vəzifəsinə seçkilər AMEA-nın nizamnaməsinə uyğun keçirilir.
Qeyd edək ki, bu il fevralın əvvəlində AMEA prezidenti Mahmud Kərimovun vəfatından sonra bu vəzifəni vitse-prezident Akif Əlizadə icra edir.