...

İran vətəndaşlarının Azərbaycanda narkotik vasitəni 30 min dollara satmasının qarşısı alınıb (FOTO)

Cəmiyyət Materials 19 Aprel 2014 13:39 (UTC +04:00)
DİN-in mətbuat xidmətindən Trend-ə bildiriblər ki, bir qrup şəxsin İran İslam Respublikasından qaçaqmalçılıq yolu ilə ölkəmizə külli miqdarda narkotik maddə gətirməsi və satmaq istəməsi barədə polisə məlumat daxil olub.
İran vətəndaşlarının Azərbaycanda narkotik vasitəni 30 min dollara satmasının qarşısı alınıb (FOTO)

Azərbaycan, Bakı, 19 aprel /Trend, müxbir İ.İzzət/

Daxili İşlər Orqanlarının əməkdaşları narkotik maddələrin qanunsuz dövriyyəsinə qarşı növbəti uğurlu əməliyyat tədbiri həyata keçirib.

DİN-in mətbuat xidmətindən Trend-ə bildiriblər ki, bir qrup şəxsin İran İslam Respublikasından qaçaqmalçılıq yolu ilə ölkəmizə külli miqdarda narkotik maddə gətirməsi və satmaq istəməsi barədə polisə məlumat daxil olub.

DİN Baş Narkotiklərlə Mübarizə İdarəsi Cənub Regional Şöbəsinin əməkdaşları dərhal əməliyyat axtarış tədbirlərinə başlayıb. İran İslam Respublikasının vətəndaşları 41 yaşlı Adil Nazimi və 36 yaşlı Rza Səidi şübhəli şəxs qismində saxlanılıblar. Onlardan xüsusi bağlamalarda ümumi çəkisi 23 kiloqram olan tiryək, 1 ədəd gecəgörmə cihazı, kəlbətin, əlcək və digər vasitələr aşkarlanaraq maddi sübut kimi götürülüb. Saxlanılan şəxslər əməllərini etiraf edərək bildiriblər ki, narkotik maddəni ölkəmizə satmaq məqsədi ilə gətiriblər. İstintaqla müəyyən edilib ki, 23 kiloqram tiryək 30 min Amerika dollarına satılmalı imiş.

Gecə saatlarında qaçaqmalçılıq yolu ilə ölkəmizə gələn Adil Nazimi ilə Rza Səidi narkotik maddəni gizlədərək əvvəlcədən tapdıqları müştərini gözləyiblər. Bu zaman əməliyyata başlayan polis əməkdaşları onları ələ keçiriblər.

Faktla bağlı cinayət işi açılıb, istintaq narkotik maddənin mənbəyini araşdırır.

Məqalədə:
Xəbər lenti

Xəbər lenti