...

Bakıda daha bir park istifadəyə verildi (FOTO)

Cəmiyyət Materials 9 May 2014 17:29 (UTC +04:00)
Ümummilli lider Heydər Əliyevin anadan olmasının 91-ci ildönümü ərəfəsində keçmiş Bakı yod zavodunun Sabunçu istehsalat sahəsinin ərazisində "Eco Land" adlı yeni park istifadəyə verilib.
Bakıda daha bir park istifadəyə verildi (FOTO)

Azərbaycan, Bakı, 9 may /Trend, müxbir E.Mehdiyev/

Ümummilli lider Heydər Əliyevin anadan olmasının 91-ci ildönümü ərəfəsində keçmiş Bakı yod zavodunun Sabunçu istehsalat sahəsinin ərazisində (Ramana qəsəbəsi) "Eco Land" adlı yeni park istifadəyə verilib.

Trend-in məlumatına görə, parkın açılışında fövqəladə hallar naziri Kəmaləddin Heydərov, digər dövlət rəsmiləri və ictimaiyyət nümayəndələri iştirak ediblər.

Parka baxış keçirdikdən sonra K.Heydərov jurnalistlərə açıqlamasında bildirib ki, bu park 2012-ci ilin may ayına qədər keçmiş yod zavodunun ərazisi idi və burada yod istehsalı üçün müəyyən komponentlərdən istifadə olunurdu: "Yod zavodu fəaliyyətini dayandırdıqdan sonra bu ərazidə olan radioaktiv maddələr əhalinin səhhətinə pis təsir edirdi".

Nazir qeyd edib ki, keçmiş Bakı yod zavodunun daha bir istehsalat sahəsi Suraxanı ərazisində yerləşir. Eləcə də Neftçala rayonunda yod zavodu var.

K.Heydərovun sözlərinə görə, Prezident İlham Əliyevin xüsusi tapşırığına və sərəncamına əsasən, FHN 2012-ci ilin mayında bu ərazinin təmizlənməsi işinə başladı: "2012-ci ilin sentyabrında burada olan bütün zərərli torpaq Pirəküşkül qəsəbəsində xüsusi hazırlanmış yerlərə daşındı. Ondan sonra bu ərazidə park salınması qərara alındı. Təmizləmə işlərində FHN Beynəlxalq Atom Enerjisi Agentliyinin nümayəndələri ilə birgə ərazidə radiasiyanın miqdarını ölçdü və ərazi radioaktiv maddələrdən ideal surətdə təmizlənərək zərərsiz əraziyə çevrildi".

6,5 hektar ərazisi olan bu parkda uşaqların əyləncəsi üçün qurğular, idman qurğuları və fəvvarə quraşdırılıb.

Nazir qeyd edib ki, Suraxanı istehsalat sahəsinin ərazisi 28 hektar idi. Ora sənaye zonası olduğu üçün park salınması nəzərdə tutulmayıb: "Yəqin ki, orada meşə zolaqları salınacaq".

Məqalədə:
Xəbər lenti

Xəbər lenti