Azərbaycan, Bakı, 17 iyul /Trend, müxbir İlhamə İsabalayeva/
İyulun 18-19-da ölkə ərazisində isti hava şəraiti müşahidə edilsə də, iyulun 20-dən temperaturların 3-5 dərəcə enəcəyi, havanın küləki keçəcəyi gözlənilir.
Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun baş hidroloqu Asif Verdiyev Trend-ə bildirib ki, iyulun 20-21-də ölkə ərazisində nisbətən sərin hava şəraiti hökm sürəcək.
İyulun 18-də Bakıda və Abşeron yarımadasında hava şəraiti yağmursuz keçəcək. Şimal-qərb küləyi gündüz cənub-şərq küləyi ilə əvəz olunacaq.
Havanın temperaturu gecə 22-26, gündüz 33-38 dərəcə isti olacaq.
A.Verdiyev bildirib ki, iyulun 19-da isti hava şəraiti olsa da, hava küləkli keçəcək.
İyulun 18-19-da Abşeron yarımadasında gündüz saatlarında isti temperatur meteohəssas insanlar üçün əlverişsiz olacaq. İyulun 20-də isə güclü xəzri küləyi fonunda havanın temperaturunun bir qədər enməsi müsbət amildir.
İyulun 18-də Azərbaycanın rayonlarında hava əsasən yağmursuz olacaq. Lakin axşam bəzi şimal və qərb rayonlarında şimşək çaxacağı, yağış yağacağı ehtimalı var. Gündüz qərb küləyi axşama doğru arabir güclənəcək.
Havanın temperaturu gecə 21-26, gündüz 33-38, bəzi yerlərdə 40, dağlarda gecə 11-16, gündüz 24-29 dərəcə isti olacaq.