Bakı. Elçin Hüseynov - Trend:
Avropa İttifaqı (Aİ) Şurası Yunanıstana Şengen sazişinin həyata keçirilməsi üzrə pozuntuların aradan qaldırılması üçün 3 ay vaxt verib. Trend TASS-a istinadən xəbər verir ki, bu barədə Şuranın bugünkü bəyanatında deyilir.
Sənəddə deyilir ki, Şura Şengen sazişinin xarici sərhədlərlə bağlı tələblərinin Yunanıstan tərəfindən ciddi pozulmasına dair öz tövsiyələrini verib: "Tövsiyələrdə nöqsan və çatışmazlıqların aradan qaldırılması yolları da öz əksini tapıb".
Yunanıstan qeyd olunan zaman kəsiyində nöqsanları aradan qaldırmayacağı təqdirdə Avropa Komissiyası Şengen Məcəlləsinin 26-cı bəndinə uyğun addımlar ata bilər. Bu halda Aİ ölkələrinin Yunanıstanla sərhədləri 2 il müddətinə bağlanacaq.
Avropa Komissiyasının rəsmiləri bəyan edirlər ki, Yunanıstanın sərhədlərində qanunsuz miqrantların sənədləri lazımi şəkildə yoxlanılmır. Bunun nəticəsi kimi Avropada miqrasiya böhranı yaşanır.