Azərbaycan, Bakı, 24 may /Trend, müxbir/ Tbilisi-İstanbul marşrutu ilə hərəkət edən sərnişin avtobusu bazar ertəsi Türkiyənin Rizə rayonu ərazisində aşıb, 30-dan çox insan xəsarət alıb, bu barədə Gürcüstan mətbuatı məlumat yayıb.
Avtobusda gürcü vətəndaşlarından başqa Azərbaycan, Hindistan və Çexiya vətəndaşları olub. Avtobusda olan 45 nəfərdən 33-ü xəsarət alıb. Üç ağır yaralı vertolyotlarla Ankara xəstəxanalarına çatdırılıb, digərləri yaxınlıqdakı klinikalara yerləşdirilib.
Axşama xəstəxanalarda 16 nəfər qalıb, digərləri həkimlər tərəfindən buraxılıb.
Sərnişinlər jurnalistlərə bildiriblər ki, hadisə baş verən ərazidə yolun bərpası işləri aparılırdı.