Azərbaycan, Bakı, 7 oktyabr /Trend, müxbir K. Zərbalıyeva/
Azərbaycanın Şamaxı şəhərində baş vermiş partlayışa, ilkin ehtimala görə, məişət qazının sızması səbəb olub.
Fövqəladə Hallar Nazirliyinin rəsmi İnternet-saytının cümə axşamı yaydığı məlumatda xəbər verilir.
Vətəndaşa məxsus ümumi sahəsi 240 kv.m olan birmərtəbəli beşotaqlı evdə partlayış baş verib, yanğın olmayıb. Nəticədə, bir otağın tavanı 32 kv.m sahədə dağılıb, 2 otağın pəncərələri sınıb; hadisə zamanı evdə olan üç nəfər yanıq xəsarətləri alıb.
Yaralılar xəstəxanaya yerləşdirilib. Hadisə ilə əlaqədar müvafiq qurumlar tərəfindən araşdırma aparılır.