Təfərrüatlar əlavə olunub (ilk xəbər saat 12:18-də yayılıb)
Azərbaycan, Bakı, 22 iyun /Trend, müxbir E.İsmayılov/
"Air Astana" aviaşirkətinin Almatı-Bakı marşrutu üzrə hərəkət edən təyyarəsi cümə günü Şımkent aeroportunda məcburi eniş edib. Bu barədə cümə günü Trend-ə Heydər Əliyev Beynəlxalq Hava Limanından məlumat veriblər.
Təyyarə Bakıya yerli vaxtla saat 12:55-də eniş etməli idi. Lakin məcburi eniş səbəbindən saat 15:30-dək yubanma elan edilib. Təyyarə Şımkentə Bakı vaxtı ilə sat 10:21-də enib. Bu barədə Trend-ə aeroportdan bildiriblər. Aeroportdan enişin səbəblərini açıqlamayıblar.
KS-111 reysini "Airbus 320-200" təyyarəsi həyata keçirib.
Qazaxıstanın "KazTAQ" agentliyinin məlumatına görə, eniş nəticəsində xəsarət alan yoxdur.
"Təyyarə nasaz olub. Almatı-Bakı marşrutu üzrə hərəkət edən KS-111 reysi Şımkentdə məcburi eniş edib", - təyyarənin sərnişini Serdalı İbjanov cümə günü "KazTAQ"-ın müxbirinə bildirib. Sərnişinin sözlərinə görə, aerovağzalın binasında təyyarənin göyərtəsindən təxliyyə edilən sərnişinlər var. Hadisə yerində xilasetmə, təcili yardım və yanğınsöndürmə xidmətləri işləyir.