...

Şamaxıda qətl - ruhi xəstə qohumu qadını daşla öldürərək quyuya atıb

Hadisə Materials 14 Noyabr 2017 11:57 (UTC +04:00)
Şamaxı Rayon Polis Şöbəsinə gələn yeniyetmə anasının itkin düşməsi barədə məlumat verib.
Şamaxıda qətl - ruhi xəstə qohumu qadını daşla öldürərək quyuya atıb

Bakı. Trend:

Noyabrın 13-də səhər tezdən Şamaxı Rayon Polis Şöbəsinə gələn yeniyetmə anasının itkin düşməsi barədə məlumat verib. Araşdırmalarla müəyyən edilib ki, hər səhər onu məktəbə yola salan anası Badamı görməyən oğul həyəcanlanıb və dərhal polisə müraciət edib.

Daxili İşlər Nazirliyindən Trend-ə verilən məlumata görə, yaradılan istintaq-əməliyyat qrupu şəhərin Azadlıq küçəsindəki həmin ünvana gəlib, müvafiq tədbirlər həyata keçirib.

Həyətdəki quyunun daş-kəsəklə doldurulması diqqət çəkib. Oğlan da onun dolu olduğunu səhər gördüyünü bildirib.

Polis və prokurorluq orqanlarının əməkdaşları tərəfindən dərinliyi 3 metr olan həmin quyu təmizlənərkən oraya atılmış qadın meyidi aşkar olunaraq çıxarılıb.

Faktla bağlı rayon Prokurorluğunda Cinayət Məcəlləsinin müvafiq maddəsi ilə cinayət işi başlanılıb.

İstintaq zamanı 57 yaşlı Badam Bağırovanın noyabrın 12-dən 13-nə keçən gecə ruhi xəstə olan yaxın qohumu tərəfindən münaqişə zəminində daşla qətlə yetirildiyi müəyyən olunub.

Bu ağır cinayəti törətməkdə şübhəli bilinən əvvəllər məhkum olunmuş Rəhim Bağırov polis əməkdaşları tərəfindən tutularaq istintaqa təhvil verilib.

Faktla bağlı təxirəsalınmaz tədbirlər davam etdirilir.

Məqalədə:
Xəbər lenti

Xəbər lenti