Azərbaycan, Bakı, 22 yanvar / Trend , müxbir M.Əliyev/
Prezident Administrasiyasının xarici əlaqələr şöbəsinin müdiri Movruz Məmmədov ümidvar olduğunu bildirib ki, qarşıdakı Azərbaycan, Ermənistan və Rusiya prezidentlərinin Soçi görüşündə Azərbaycan-Ermənistan münaqişəsinin nizamlanması prosesində müəyyən irəliləyişlər üçün zəmin yarana bilər.
Yanvarın 25-də Soçidə Azərbaycan, Ermənistan və Rusiya prezidentlərinin üçtərəfli görüşü keçiriləcək.
"Düşünürəm ki, Ermənistan rəhbərliyi son proseslər fonunda düşüncəli hərəkət edərək münaqişənin həlli üçün müəyyən şərait yarada bilər", - Məmmədov cümə günü jurnalistlərə deyib.
"Yəni Ermənistan konstruktiv mövqe tutmaqla nizamlanma prosesində irəliləyişə nail olmaq üçün imkan yaradacaq", - o qeyd edib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Baş Assambleyasının Dağlıq Qarabağın və işğal olunmuş ərazilərin azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib