Azərbaycan, Bakı, 19 oktyabr /Trend, müxbir A.Qasımova/
Rusiyanın müxtəlif münaqişələri, o cümlədən, "dondurulmuş" münaqişələri həll etmək üçün potensialı var. Bu barədə Rusiya Prezidenti Dmitri Medvedev Dovilada mətbuat konfransında deyib. Xəbəri "Rossiya 24" telekanalı yayıb.
"Biz münaqişələrin həllində müəyyən nəticələrə nail ola bilərik, lakin bunun üçün bütün münaqişə tərəflərinin konstruktiv mövqe tutmaları da lazımdır", - Medvedev qeyd edib.
Rusiyanın vasitəçi kimi çıxış etdiyi dondurulmuş münaqişələrdən biri - Ermənistan-Azərbaycan, Dağlıq Qarabağ münaqişəsidir.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan silahlı qüvvələrinin işğalı altındadır.
1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır. BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.