Azərbaycan, Bakı, 18 iyun /Trend, müxbir E.Tarıverdiyeva/
Azərbaycan və Ermənistanın xarici işlər nazirləri Elmar Məmmədyarov və Edvard Nalbandyan Parisdə Dağlıq Qarabağ münaqişəsinin nizamlanmasının gedişini müzakirə ediblər. Trend-in məlumatına görə, bu barədə bazar ertəsi ATƏT-in yaydığı məlumatında deyilir.
Görüşdə ATƏT-in Minsk qrupunun Fransa, ABŞ və Rusiyadan olan həmsədrləri Jak For, Robert Bradtke və İqor Popov, həmçinin ATƏT-in fəaliyyətdə olan sədrinin şəxsi nümayəndəsi Anji Kaspşik iştirak ediblər.
"Xarici işlər nazirləri sülh nizamlanmasının əldə edilməsi üzrə həmsədrlərlə işi davam etdirmək üçün qətiyyətlərini qeyd edib, habelə danışıqların ab-havasını yaxşılaşdıra biləcək etimadın möhkəmləndirilməsi üzrə tədbirlərə hazır olduqlarını təsdiq ediblər", - məlumatda deyilir.
Məlumatda qeyd edilir ki, həmsədrlər nazirlərlə Dağlıq Qarabağ münaqişənin nizamlanması yollarını, həmçinin humanitar sahədə əlaqələrin inkişafı ilə bağlı gələcək işləri və atəşkəs rejiminin pozulmasının araşdırılması üçün mexanizmin yaradılmasını, o cümlədən tarixi və mədəni əhəmiyyətli obyektlərin qorunmasını müzakirə ediblər.
Həmsədrlər, həmçinin bu yaxınlarda təmas xətti boyunca baş verən insidentlərlə bağlı dərin narahatlıqlarını ifadə edib və 1994-cü ildə əldə edilən atəşkəs rejimi haqqında sazişə əməl etməyin vacibliyini vurğulayıblar.
"Görüş müsbət, konstruktiv ab-havada keçib", - məlumatda bildirilir.
Həmsədrlər növbəti addım kimi, regiona yaxın həftələr ərzində gələcəklər.