...

Ağ Ev Dağlıq Qarabağ münaqişəsi və Xocalı faciəsi üzrə petisiyaları cavablandırıb

Ermənistan-Azərbaycan münaqişəsi Materials 26 Fevral 2013 07:21 (UTC +04:00)
Ağ Ev rəsmi saytında yerləşdirilmiş Dağlıq Qarabağ münaqişəsi və Xocalı faciəsi üzrə petisiyalara rəsmi cavab yayıb.
Ağ Ev Dağlıq Qarabağ münaqişəsi və Xocalı faciəsi üzrə petisiyaları cavablandırıb

Azərbaycan, Bakı, 26 fevral /Trend/

Ağ Ev rəsmi saytında yerləşdirilmiş Dağlıq Qarabağ münaqişəsi və Xocalı faciəsi üzrə petisiyalara rəsmi cavab yayıb.

Qeyd olunur ki, ABŞ Dağlıq Qarabağ münaqişəsinin sülh yolu ilə nizamlanmasına sadiqdir.

"ABŞ Prezidentinin bununla bağlı xüsusi bəyanatı olmasa da, Birləşmiş Ştatlar Azərbaycan və Ermənistan arasında müharibə vaxtı insanların faciəli şəkildə həlak olmasına dərin təəssüflənir. Ağ Ev xatırladır ki, Dağlıq Qarabağ münaqişəsinin hərbi yolla həlli yoxdur və bu münaqişənin yalnız dinc yolla nizamlanması regionda sabitliyi, çiçəklənməni və barışıqları təmin edə bilər. ATƏT-in Minsk qrupunun həmsədri kimi, ABŞ əvvəlki kimi sülhə nail olunması üçün bütün tərəflərlə əməkdaşlığa sadiqdir", - sənəddə deyilir.

Daha əvvəl Ağ Evin rəsmi saytının xüsusi bölməsində Xocalı soyqırımının və Azərbaycan ərazilərinin işğalının tanınması ilə əlaqədar iki petisiya yerləşdirilmişdi. Onlardan hər ikisi ABŞ Prezidenti Barak Obama tərəfindən qiymətləndirilməsi üçün imzaların lazımi sayını (100 000) yığıblar.

1992-ci il fevralın 26-da Ermənistan hərbi birləşmələri 7 min əhalisi olan Xocalı şəhərində soyqırım aktı həyata keçirdi. Ermənistan hərbi birləşmələrinin şəhərə hücumu zamanı burada yalnız 3 minə yaxın insan var idi. Çünki mühasirədə qaldığı 4 aydan artıq zaman ərzində blokadada olduğu üçün əhalinin xeyli hissəsi şəhərdən çıxmaq məcburiyyətində qalmışdı. Xocalı soyqırımı zamanı 613 nəfər ödürüldü, 1000 nəfər müxtəlif yaşlı dinc sakin aldığı güllə yarasından əlil oldu. 106 nəfər qadın, 63 azyaşlı uşaq, 70 qoca öldürüldü. 8 ailə tamamilə məhv edildi, 25 uşaq hər iki valideynini, 130 nəfər valideynlərindən birini itirdi. Faciə baş verən gecə 1275 nəfər dinc sakin girov götürüldü, onlardan 150-nin taleyi indi də məlum deyil.

İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır.

Məqalədə:
Xəbər lenti

Xəbər lenti