(ARKA) - Ukraynanın Ermənistandakı səfiri Aleksandr Bojko öz ölkəsinin zərurət yaranarsa Ukrayna sülh məramlılarını Dağlıq Qarabağın münaqişə zonasına göndərilməsinə hazır olduğunu təsdiq edib.
Trend bildirir ki, Ukrayna səfiri jurnalistlərin suallarını cavablandırarkən Ukrayna XİN başçısı Boris Tarasyukun bu yaxınlarda etdiyi bəyanatı xatırladıb.
Həmin bəyanatda qeyd olunur ki, əgər bu, beynəlxalq təşkilatların, hər şeydən əvvəl, BMT və ATƏT-in qərarı və hər iki tərəfin razılığı əsasında münaqişənin sülh yolu ilə nizama salınması prosesində tələb olunursa, onda Ukrayna öz sülhməramlılarını münaqişə zonasına göndərməyə hazırdır.
"Bizim mövqeyimiz məhz bundan ibarətdir"-deyə A. Bojko qeyd edib.