Ermənistanda əsirlikdə saxlanılan 782 azərbaycanlı barədə Azərbaycan tərəfində dəqiq məlumat var. Trend xəbər verir ki, bu barədə Əsir, Girov və İtkin düşmüş vətəndaşlarla İş üzrə Dövlət Komissiyasının üzvü, millət vəkili Azay Quliyev bildirib.
Qeyd edək ki, rəsmi məlumatlara görə, Ermənistanda 4782 azərbaycanlı əsir və girov saxlanılır.
A.Quliyev onu da qeyd edib ki, Ermənistanda əsirlikdə saxlanılan 782 azərbaycanlı barədə dəqiq məlumat var: "Onları əsirlikdə görən şahidlər var. Yerdə qalan soydaşlarımız isə "itkin" düşüb. Daha doğrusu, həmin insanlar da əsir götürülüb, sadəcə olaraq Ermənistan onları gizlədib və guya itkin düşmüş kimi qələmə verir. Bizdə məlumat var ki, konkret olaraq hansı cəzaçəkmə müssisəsində hansı ad altında məhbusun və yaxud da girovun saxlanıldığı haqqında məlumat var. Hətta həmin düşərgənin rəisinin adı da var. Sadəcə olaraq Ermənistan həmişəki kimi əsirləri qaytarmaq istəmir".
A.Quliyev onu da vurğulayıb ki, məsələ ilə bağlı Avropa Şurası, Beynəlxalq Qırmızı Xaç Komitəsi öz mövqeyini bildirəcək. Millət vəkili onu da qeyd edib ki, Azərbaycan tərəfindən itkin düşən insanların valideynləri Beynəlxalq Qırmızı Xaç Komitəsinin bu istiqamətdəki fəaliyyətindən narazıdırlar.
