Azərbaycan, Bakı, 25 dekabr / Trend / Azərbaycan prezidenti İlham Əliyev Həmrəylik Günü münasibətilə Dünya azərbaycanlılarını təbrik edib, informasiyanı AzərTAc Dövlət Agentliyi yayıb.
Təbrikdə deyilir ki, ölkəmizdə və onun hüdudlarından kənarda yaşayan azərbaycanlıların hər il dekabrın 31-də təntənə ilə qeyd etdiyi Dünya azərbaycanlılarının həmrəyliyi günü milli birlik, Azərbaycana məhəbbət, milli-mənəvi dəyərlərimizə hörmət, Vətənə bağlılıq hisslərini özündə təcəssüm etdirir. Uzun illərdən bəri bütün dünyada yaşayan həmvətənlərimizi və soydaşlarımızı düşündürən dünya azərbaycanlılarının həmrəyliyi ideyası ümummilli liderimiz Heydər Əliyevin tarixi xidmətləri sayəsində dövlət siyasəti səviyyəsinə qaldırılmış və ardıcıl olaraq həyata keçirilib.
Prezidentin təbrik məktubunda daha sonra bildiririlir ki, son illər ərzində dünyanın müxtəlif ölkələrində yaşayan azərbaycanlıların milli özünüdərkinin güclənməsi, birlik və mütəşəkkilliyinin artması, tarixi vətənlə əlaqələrinin möhkəmlənməsi diaspor potensialının mühüm amilə çevrildiyini göstərir. 2006-cı ilin martında Bakıda keçirilmiş Dünya azərbaycanlılarının II qurultayında qəbul edilmiş qərarların, qarşıya qoyulmuş vəzifələrin uğurla yerinə yetirilməsi diaspor quruculuğuna, milli - mənəvi və ümumbəşəri dəyərlərə söykənən azərbaycançılıq ideologiyasının yayılmasına güclü təkan verib.
Soydaşlarımız Azərbaycan həqiqətlərinin
dünya ictimaiyyətinə çatdırılmasında,
zəngin mədəni irsimizin təbliğində,
təcavüzkar erməni dairələrinin ideoloji
təxribatlarının qarşısının
alınmasında qətiyyət nümayiş etdirirlər.
Eyni zamanda, Azərbaycan dövlətinin dəstəyi
sayəsində qardaş və dost xalqların lobbi və
diasporları ilə səmərəli
əməkdaşlığın qurulması sahəsində
təsirli tədbirlər həyata keçirilir.
İlham Əliyev məktubda qeyd edib ki, indiki dövrdə
xalqımızın qarşısında duran başlıca
problem hələ də Ermənistan-Azərbaycan,
Dağlıq Qarabağ münaqişəsinin tezliklə
ədalətli həllinə nail olmaq və ölkəmizin
ərazi bütövlüyünü bərpa etməkdən
ibarətdir. "Hesab edirəm ki, Azərbaycan dövləti
ilə yanaşı, bütün həmvətənlərimiz
bu sahədə səylərini gücləndirməkdə
davam edəcəklər. Diasporumuz öz
mütəşəkkilliyini və çevikliyini bir
qədər də artırmalı, digər xalqların diaspor
mərkəzləri ilə əlaqələrini
genişləndirməli, ölkəmizə qarşı
yönəlmiş informasiya təxribatlarını vaxtında
ifşa etməlidir,"- prezident əlavə edib.
Məqalə müəllifi ilə əlaqə ünvanı: [email protected]