Azərbaycan, Bakı, 18 mart / Trend , müxbir N.Abdullayeva /
MDB Parlamentlərarası Assambleyasının müşahidəçiləri ölkə Konstitusiyasına dəyişikliklərin edilməsi üzrə referendumun yaxşı təşkil olunduğunu qeyd edirlər. Bu barədə Trend -a missiyanın Rusiyadan olan üzvü Yevqeni Kazvin bildirib.
Kazvinin sözələrinə görə, MDB PA müşahidəçiləri referendum günü Bakının yeddi məntəqəsinə baş çəkiblər və seçici fəallığının şahidi olublar. Yerli vaxtı ilə saat 11:00 üçün bu yeddi seçki məntəqəsində seçicilərin 30-35 faizi səsvermədə iştirak edib.
"Pozuntu aşkarlanmayıb, səsvermə normal təşkil olunub", - deyə Səbail rayonun beşinci seçki məntəqəsində səsvermənin gedişatı ilə tanış olandan sonra Kazvin bildirib.
Burada 1420 seçici qeydiyyata alınıb. Saat 12:00-dək 350 nəfər səs verib.
Çərşənbə günü Azərbaycanda Konstitusiyanın 29 maddəsinə əlavə və dəyişikliklərin edilməsi məsələsi üzrə referendum keçirilir.
Azərbaycanda referendum üzrə təşviqat qrupları fevralın 18-dən etibarən təbliğat kampaniyasına başlayıb. Referendum üzrə qəbul olunan təqvim cədvəlinə əsasən, kampaniyalar martın 16-sı gecə başa çatdırılıb. Təşviqat qruplarının hər birinə təbliğat kampaniyası üçün 23 min manat vəsait ayrılıb.
Azərbaycan Konstitusiyası 1995-ci ildə qəbul olunub, 2002-ci ildə Əsas qanuna əlavə və dəyişikliklər edilib