Azərbaycan, Bakı, 29 mart / Trend , müxbir N.Abdullayeva /
"GUAM - demokratiya və iqtisadi inkişaf təşkilatı"nın milli koordinatorlarının növbəti görüşü aprel ayına nəzərdə tutulub", - Trend -a GUAM Katibliyindən deyilib.
"Görüşdə siyasi qarşılıqlı fəaliyyət, sahə əməkdaşlığı və təşkilati fəaliyyətlə bağlı bir sıra məsələlərin müzakirə edilməsi planlaşdırılır", - Katiblikdən bildirilib.
Milli koordinatorların görüşündə Azərbaycanı xarici işlər nazirinin müavini Araz Əzimov təmsil edəcək.
"Görüşün dəqiq yeri və vaxtı diplomatik kanallarla dəqiqləşdirilir", - Katiblikdən deyilib.
GUAM təşkilatı 1997-ci ildə Strasburqda Avropa İttifaqı dövlət başçılarının Sammiti zamanı regional əməkdaşlıq məqsədilə yaradılıb, lakin qurum 2005-ci ilədək əməli olaraq fəaliyyət göstərməyib. Son üç ildə keçirilən sammitlərin əsas məsələləri regional münaqişələrin nizamlanması və enerji təhlükəsizliyinin təminatı üzrə səylərin əlaqələndirilməsindən ibarət olub.
Məqalə müəllifi ilə əlaqə ünvanı: [email protected]