Azərbaycan, Bakı, 21 iyul / Trend /
Azərbaycan Prezidenti İlham Əliyev çərşənbə axşamı "Aqrolizinq" ASC-nin texniki bazasının möhkəmləndirilməsinə əlavə dəstək verilməsi məqsədi ilə sərəncam imzalayıb. Məlumatı AzərTAc Dövlət İnformasiya Agentliyi yayıb.
Sərəncamla "Aqrolizinq" ASC-nin aqroservis filiallarının ölkənin regionlarında tikintisinin davam etdirilməsi məqsədi ilə 2009-cu ilin dövlət büdcəsində nəzərdə tutulmuş Prezidentin Ehtiyat Fondundan ASC-nin nizamnamə kapitalının artırılması üçün 5 milyon manat vəsait ayrılıb.
Həmçinin "Naxçıvan Aqrolizinq" ASC-nin sərəncamında olan gübrələrin və kənd təsərrüfatı texnikasının saxlanması üçün xüsusi anbarların tikilməsi məqsədi ilə Prezidentin Ehtiyat Fondundan Naxçıvan MR-in Nazirlər Kabinetinə 2 milyon manat ayrılıb.
Əmlak Məsələləri Dövlət Komitəsi və Vergilər Nazirliyinə bir ay müddətində "Aqrolizinq" ASC-nin nizamnamə kapitalının artırılması ilə bağlı ASC-nin Nizamnaməsində müvafiq dəyişikliyin edilməsi və həmin dəyişikliyin qeydiyyata alınması üçün öz səlahiyyətləri daxilində zəruri tədbirlərin həyata keçirilməsi tapşırılıb.