Fransa, Strasburq, 8 yanvar/ Trend , müxbir A. Məhərrəmli/
Avropa Şurası Parlament Assambleyasının Azərbaycan üzrə həmməruzəçiləri Andres Herkel və Cozef Debono Qrex cari ilin 8-12 fevral tarixlərində Azərbaycana səfər edəcək. Bu barədə cümə günü Trend -a AŞ PA katibliyindəki mənbədən məlumat verilib.
Qeyd edək ki, həmməruzəçilərin Azərbaycana səfər barədə qərar qurumun Monitorinq Komitəsinin 2009-cu ilin 17 dekabr tarixində Parisdə keçirilmiş iclasında qəbul edilib.
Səfər çərçivəsində həmməruzəçilərin Azərbaycan Respublikasının prezidenti, Prezident Administrasiyasının rəhbəri, Milli Məclisin sədri, Ədliyyə naziri, Baş prokuror, Mərkəzi Seçki Komissiyasının və Milli Teleradio Şurasının sədrləri, Ombudsman Aparatının rəhbəri, Azərbaycanın AŞ PA-dakı nümayəndə heyətinin üzvləri, eləcə də iqtidar və müxalifət partiyalarının nümayəndələri, jurnalistlər və qeyri-hökümət təşkilatlarının nümayəndələri ilə görüşlər keçirməyi nəzərdə tutulmuşdur.
Bundan əlavə, səfər çərçivəsində həmməruzəçilərin Gəncə və Sumqayıt şəhərlərinə səfəri gözlənilir.