Azərbaycan, Bakı, 19 mart / Trend , müxbir V.Javoronkova/
Cümə günü Avropa Şurasının Yerli və Regional Hakimiyyətlər Konqresi 2009-cu il dekabrın 23-də Azərbaycanda keçirilmiş bələdiyyə seçkilərinə dair diskussiyalar çərçivəsində məruzə, qətnamə və tövsiyələr buraxıb. Bu barədə təşkilatın məlumatında deyilir.
Somma Departamentinin (Fransa) Baş Şurasının vitse-prezidenti Frensis Lek tərəfindən təqdim olunan məruzə 2009-cu il dekabrın 20-24-də Azərbaycanda seçkiləri müşahidə missiyasının yekunlarına həsr olunub. Missiya nümayəndə heyətinə seçilmiş Konqres nümayəndələri daxil olub.
Məruzədə verilən rəyə görə, ümumilikdə, seçkilər texniki baxımdam yaxşı hazırlanıb və sakit atmosferdə keçib. Bununla yanaşı, qeydiyyat prosesi və səslərin hesablanması ilə bağlı şübhələr yaranıb.
Konqres, həmçinin, mərkəzi hakimiyyətə münasibətdə bələdiyyələrə böyük muxtariyyətin və maliyyə müstəqilliyinin verilməsi üçün zəruri islahatların aparılmasına, Bakı şəhərinin meri postuna seçkilərin keçirilməsinə yardım göstərməyə hazır olduğunu bildirib.
