Doğma Azərbaycanımızın hər yerində xalqımız qədim el bayramı olan Novruzu böyük sevinc və yüksək əhval-ruhiyyə ilə qarşılayır.
Azərbaycan Prezidentinin Novruz bayramı münasibətilə təbrikində deyildiyi kimi, xalqımız min illər ərzində təşəkkül tapmış ənənələrə sadiq qalaraq, hər il Novruz gününü təntənə ilə bayram edir.
Ən ali keyfiyyətləri özündə cəmləşdirən bayram kimi Novruzun YUNESKO tərəfindən bəşəriyyətin mədəni irs nümunələri siyahısına daxil edilməsi təqdirəlayiq haldır.
Bahar bayramının kütləvi el şənlikləri və mərasimlərlə dövlət səviyyəsində keçirilməsi və yurdumuzun hər bir guşəsində sonsuz sevinclə qarşılanması milli müstəqilliyimizin bizə bəxş etdiyi nailiyyətlərdəndir. Ölkəmizin hüdudlarından uzaqlarda yaşayan və qəlbləri Azərbaycanla birgə döyünən soydaşlarımız bu əziz günü bizimlə bərabər qeyd edirlər.
Həmişə olduğu kimi, bu dəfə də baharın gəlişi münasibətilə ölkəmizin paytaxtı Bakıda ən izdihamlı bayram şənlikləri keçirilib. Martın 20-də qədim Qız qalasının qarşısında bayram münasibətilə böyük mərasim təşkil olunub.
Azərbaycan Prezidenti İlham Əliyev, xanımı Mehriban Əliyeva Novruz şənliklərində iştirak etmək üçün Qız qalasının qarşısına gəliblər. Məlumatı AzərTAc Dövlət İnformasiya Agentliyi yayıb.
Meydana toplaşmış minlərlə şəhər sakini, paytaxtımızın qonaqları dövlətimizin başçısını və onun xanımını hərarətlə qarşılayıblar.
Qədim tariximizi əks etdirən səhnələr - İçərişəhərin qala divarları və Qız qalasının üstündə dayanmış nizə və qalxanlı döyüşçülər, Dədə Qorqudun xalqa xitabı, öyüd-nəsihəti, igidləri düşmən üzərində qələbəyə səsləməsi, Bahar bayramının millətimizə ruzi-bərəkət gətirməsi üçün xeyir-dua verməsi qəhrəmanlıqla dolu keçmişimizin mənzərəsini canlandırır.
Şən, oynaq musiqi sədaları ətrafı bürüyüb. Milli geyimli uşaqlar meydanda rəqs edirlər.
Novruz tonqalını alovlandıran Prezident İlham Əliyev bayram şənliyində nitq söyləyib.
Dövlətimizin başçısı bu il yanvarın 15-də dünyaya gəlmiş İlham İlkin oğlu Əhmədovun valideyinlərinə onun Azərbaycan Respublikasının 9 milyonuncu vətəndaşı olmasını təsdiq edən Şəhadətnaməni və hesabında 20 min manat olan Əmanət kitabçasını təqdim edib.
Sonra Azərbaycan Prezidenti Dənizkənarı Milli Parkda keçirilən Novruz şənliklərində iştirak edib.
Novruz bayramı münasibətilə keçirilən şənliklərdə Baş nazir Artur Rasizadə, Milli Məclisin sədri Oqtay Əsədov, Prezident Administrasiyasının rəhbəri Ramiz Mehdiyev və digər rəsmi şəxslər iştirak edirlər.