Türkmənistan, Aşqabad, 26 mart / Trend , müxbir H.Həsənov/
Türkmənistanda Mərkəzi Asiya və Xəzər regionlarında silahsızlaşdırma problemləri üzrə beynəlxalq konfransın keçirilməsinə hazırlıq gedir. Məlumatı Türkmənistanın rəsmi mənbəsi verib.
Onun sözlərinə görə, hazırkı mərhələdə Azərbaycan, İran, Qazaxıstan, Qırğızıstan, Rusiya, Tacikistan, Türkmənistan və Özbəkistan xarici siyasət idarələrinin ekspertləri məsləhətləşmələr aparırlar. Müzakirə olunan məsələlər sırasında iştirakçıların formatı, təşkilati və protokol məsələləri də var.
Qrafikə əsasən tədbirin 2010-cu ilin birinci yarısında keçirilməsi planlaşdırılıb. 2010-cu ilin birinci yarısında baş tutacaq forumun keçirilməsinə dair rəsmi Aşqabadın təşəbbüsü 2009-cu ilin sentyabrında BMT Baş Assambleyasının 64-cü sessiyasında Türkmənistan Prezident Qurbanqulu Berdımuhammedov tərəfindən irəli sürülüb.
Konfransda əsas diqqətin üç əsas istiqamətə yönəldiləcəyi gözlənilir:
- Mərkəzi Asiya və Xəzər hövzəsi regionlarında silahsızlaşdırma məsələsinə dair vəziyyətin təhlili və icmalı;
- beynəlxalq hüquq bazasının əhəmiyyəti və onun gələcək təkmilləşdirilməsi ilə bağlı problemlər;
- silahsızlaşdırma məsələlərinin həllində beynəlxalq təşkilatların rolu.
Yuxarıda sadalanan prioritetlərin hər biri özündə silahsızlaşdırma sahəsində işlərin real vəziyyətinə, bu sahədə beynəlxalq-hüquqi sənədlər sisteminin inkişaf perspektivlərinə, təhlükəsizliyin və sabitliyin möhkəmləndirilməsi problemləri ilə məşğul olan beynəlxalq strukturların fəaliyyətinin canlandırılmasına dair konkret mövzuları ehtiva edə bilər.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
