İlham Əliyev Nigeriya Federativ Respublikası Prezidentinin vəfatı ilə bağlı başsağlığı verib

Azərbaycan Prezidenti İlham Əliyev cümə axşamı Nigeriya Federativ Respublikası Prezidentinin vəzifəsini icra edən Nigeriyanın vitse-prezidenti Qudlak Conatana başsağlığı verib. Məlumatı AzərTAc Dövlət İnformasiya Agentliyi yayıb.

"Nigeriya Federativ Respublikasının Prezidenti, görkəmli dövlət xadimi Umaru Yar'Aduanın vəfatı xəbərindən son dərəcə kədərləndim. Bu ağır itki ilə əlaqədar dərdinizə şərik çıxır, Sizə, mərhumun ailəsinə və bütün Nigeriya xalqına şəxsən öz adımdan və Azərbaycan xalqı adından dərin hüznlə başsağlığı verirəm", - başsağlığı məktubunda deyilir.