Azərbaycan, Bakı, 11 may /Trend, müxbir S.Ağayeva/
Azərbaycanın xarici işlər naziri Elmar Məmmədyarov İsveçrə Parlamentinin İsveçrə-Azərbaycan Dostluq Qrupunun rəhbəri xanım Kristin Egerzegi-Obristi və dostluq qrupunun digər üzvlərini qəbul edib.
Görüş zamanı nazir Məmmədyarov qonaqların Ermənistan-Azərbaycan, Dağlıq Qarabağ münaqişəsi, regionda cərəyan edən proseslər, ölkəmizin enerji siyasəti, neftdən gələn gəlirlərin xərclənməsi, Azərbaycanda gedən iqtisadi inkişaf və digər məsələlərlə bağlı çoxsaylı suallarını ətraflı cavablandırıb. Məlumatı XİN-in mətbuat xidməti yayıb.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağın və işğal olunmuş ərazilərin azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.