Azərbaycan, Bakı, 14 may /Trend, müxbir Y.Ostapenko/
Xanım Rulofsun Azərbaycan Milli Məclisinə səfəri zamanı ailədə zorakılıq kimi gender məsələsində maariflənmənin vacibliyi müzakirə olunub.
"Ailədə zorakılıq həm Gürcüstan, həm də Azərbaycan üçün çox aktual mövzudur. Bu problemlə mübarizə üçün əhalinin məlumatlandırılma səviyyəsini artırmaq və ailə zorakılığının əsas qurbanları olan qadınlar və uşaqlara xüsusi yanaşma üsulu tapmaq lazımdır", - Rulofs Azərbaycana səfərinin yekunu olaraq jurnalistlərə bildirib.
Onun sözlərinə görə, sərmayəçilərə bu sahədə regional layihənin təklif olunması daha effektiv olardı, belə ki, sərmayəçilər və donorlar adətən milli layihələrdən daha çox, regional layihələrlə maraqlanırlar.
Rulofs deyib ki, Azərbaycanın və Gürcüstanın qanunvericiliyində ailədə zorakılığı qadağan edən bəndlər qeyd olunub, indi isə qanunvericilikdə bütün yazılanları həyatda tətbiq etmək qalır.
Birinci xanım hesab edir ki, ilk növbədə, psixoloji və hüquq-mühafizə orqanlarından kömək üçün müraciət edilə biləcək qaynar xətt yaradılmalıdır.
Rulofs, həmçinin uşaqların təhsili, sağlamlığı və nadir xəstəlikləri məsələləri ilə məşğul olan "SOKO" humanitar fondunun rəhbəridir.
Bakıya səfəri çərçivəsində Gürcüstanın birinci xanımı xərçənc xəstəliklərinin müalicəsinə böyük maraq göstərib, müasir Talassemiya Mərkəzinə baş çəkib. O, genetik qan xəstəliklərinin, o cümlədən talassemiyanın müalicəsi və profilaktikası ilə məşğul olan azərbaycanlı həkimlərin təcrübəsi ilə tanış olub.
Gələcəkdə də Gürcüstandan olan ürək qüsurlu uşaqların müalicəsini təmin etmək məqsədilə "Uşaqların xoşbəxt gələcəyi" Qeyri-Hökumət Təşkilatı ilə əməkdaşlıq nəzərdə tutulub.