Azərbaycan, Bakı, 14 may /Trend, müxbir A.Hüseynbala/
Azərbaycanın müxalif Vətəndaş Həmrəyliyi Partiyasının (VHP) Siyasi Şurası parlament seçkilərinə təkbaşına getmək barədə qərar çıxarıb.
Partiyanın mətbuat xidmətindən cümə günü Trend-ə daxil olan məlumata görə, Siyasi Şura üzvlərinin yekdil rəyi ilə partiyanın 2010-cu il seçkilərində təkbaşına iştirakı barədə qərar verilib. Daha sonra SŞ-nın iclasında namizədliyini irəli sürmək istəyən VHP-çilərin müraciətlərinə baxılıb.
Müraciət edənlərdən 31 nəfəri təsdiq olunub, digərlərinin isə növbəti toplantıda müzakirəsi qərara alınıb. Eyni zamanda, VHP-nin ümumrespublika konfransının iyunun 12-də keçirilməsi üçün qərar qəbul olunub.
Trend-in arayışı: Azərbaycanda parlament seçkilərinin 2010-cu ilin payızında keçiriləcəyi gözlənilir. Bundan əvvəlki seçkilər 2005-ci ilin noyabr ayında keçirilib. Azərbaycanda parlament seçkiləri majoritar sistem üzrə 125 seçki dairəsində keçirilir.