Azərbaycan, Bakı, 26 may /Trend, müxbir E.Tarıverdiydeva/
ABŞ-ın Azərbaycan və Ermənistanın iddia etdikləri Dağlıq Qarabağla bağlı mübahisənin həllində fəallığı gücləndirməsi vacibdir. 2008-ci ilin iyunundan 2009-cu ilin mayınadək ABŞ-ın NATO-dakı səfiri, Con Hopkins Universiteti yanında Transatlantik Münasibətlər Mərkəzinin idarəedici direktoru və Amerika Birləşmiş Ştatlarının Atlantika Şurasındakı baş müşaviri Kurt Volker belə hesab edir.
"Rusiya, Amerika Birləşmiş Ştatları və Avropa bu problem üzərində artıq illərdir çalışır və mümkün nizamlanmanın dairəsinin ümumi cizgiləri cızılıb", - Volker "The Washington Post" qəzetinə müsahibəsində deyib.
Onun sözlərinə görə, Ermənistanla Azərbaycan arasında münaqişənin nizamlanması turizmin, ticarətin, investisiyaların inkişafına və bu regionun iqtisadi rifahına kömək edəcək.
"Ermənistan-Azərbaycan sazişinin əldə olunmasını sürətləndirmək üçün ABŞ dövlət katibi Hillari Klintonun və Rusiyanın xarixi işlər naziri Sergey Lavrovun rəhbərliyi ilə ATƏT-in Minsk qrupunun görüşü çərçivəsində xarici işlər nazirlərini toplamaq lazımdır", - Volker belə hesab edir.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağın və işğal olunmuş ərazilərin azad edilməsinə dair qəbul etdiyi dörd qətnamə Ermənistan tərəfindən bu günə qədər yerinə yetirilməyib.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
