Azərbaycan, Bakı, 9 iyul /Trend, müxbir M.Əliyev/
Azərbaycann Milli Təhlükəsizlik Nazirliyinin Heydər Əliyev adına Akademiyasının əməliyyat işçilərinin hazırlanması və Sərhəd Qoşunları fakültələrinin növbəti buraxılışına həsr olunmuş təntənəli mərasim keçirilib. Bu barədə cümə günü MTN-in İctimaiyyətlə əlaqələr mərkəzi məlumat yayıb.
Akademiyanın döyüş bayrağı hərbi marşın sədaları altında meydana gətirilib.
Tədbirin əvvəlində milli təhlükəsizlik naziri general-leytenant Eldar Mahmudov, Dövlət Sərhəd Xidmətinin rəisi general-leytenant Elçin Quliyev, akademiyanın rəisi general-leytenant Ziya Yusifzadə və rəsmi qonaqlar ümummilli lider Heydər Əliyevin Akademiyanın həyətindəki abidəsi önünə əklil qoyub, ulu öndərin xatirəsini ehtiramla anıblar.
Milli təhlükəsizlik naziri Eldar Mahmudov buraxılış mərasiminə düzülmüş zabitləri və kursantları təbrik edib. Tədbir iştirakçıları ulu öndər Heydər Əliyevin, Azərbaycanın suverenliyi və ərazi bütövlüyü uğrunda mübarizədə həlak olmuş şəhidlərin əziz xatirəsini birdəqiqəlik sükutla yad ediblər. Azərbaycanın dövlət himni səsləndirilib.
Milli Təhlükəsizlik Nazirliyinin Heydər Əliyev adına Akademiyasının növbəti buraxılışı münasibətilə məzunları, onların valideynlərini, akademiyanın professor-müəllim heyətini təbrik edən Mahmudov, təcrübəli müəllimlərindən aldıqları biliklərin, qazandıqları peşə vərdişlərinin vəzifə borclarını layiqincə yerinə yetirməkdə onlara kömək olacağını vurğulayıb.
Məzunlara ümummilli lider Heydər Əliyevin adını daşıyan akademiyada oxumaq şərəfinin qismət olduğunu qeyd edən nazir bildirib ki, onlar ölkənin təhlükəsizliyi və milli maraqlarının qorunması sahəsində fəaliyyət üzrə xüsusi təhsil ocağını bitiriblər. Bu isə hər şeydən əvvəl ulu öndər Heydər Əliyevin peşəkarlıq irsini davam etdirməyə, Azərbaycanın durmadan qüdrətlənməsi işində fəaliyyətə hazır olmaq deməkdir.
Gənc zabitlərin Azərbaycanın milli təhlükəsizliyi və sərhədlərinin qorunması işində təcrübəli həmkarları ilə çiyin-çiyinə çalışacağını deyən nazir bildirib ki, bu istiqamətdə akademiyada əldə etdikləri biliklərin rolu böyük olacaq. Milli təhlukəsizlik naziri bu işdə əməyi olan hər kəsə, ilk növbədə, təlim-tədris prosesinin yüksək səviyyəsinə görə akademiyanın rəhbərliyinə və müəllim heyətinə təşəkkürünü bildirib.
İldən-ilə akademiyanın maddi-texniki imkanlarının artdığını diqqətə çatdıran Mahmudov, ötən buraxılışdan bəri görülmüş tədbirlərin buna əyani misal olduğunu vurğulayıb. Bildirilib ki, akademiyada hər cür şəraitə malik 4500 kvadratmetrdən çox sahəni əhatə edən yeni İdman Sağlamlıq Kompleksi açılıb, şəxsi heyətin istifadəsində olan tədris və sosial təyinatlı bir çox korpuslarda əsaslı təmir işləri aparılıb. Akademiyanın müasir avadanlıq və texniki vasitələrlə təchizatı işi davam etdirilib. Gələcək əməkdaşların seçdikləri peşəyə dərindən yiyələnməsi üçün bütün lazımi imkanların akademiyada mövcudluğu və bunların yeni nəslin ulu öndər Heydər Əliyevin vətənpərvərlik məktəbinə sadiq insanlar kimi yetişməsi üçün yaradılmış möhkəm təməl olduğu qeyd edilib.
Prezident, Ali Baş Komandan İlham Əliyevin "Akademiya ən yüksək dünya standartlarına cavab verir" fikrini xatırladan nazir vurğulayıb ki, dövlətimizin başçısının bu sözləri nazirliyin və akademiya kollektivinin ümumi əməyinə verilən yüksək qiymətdir və gələcəkdə daha səmərəli fəaliyyət üçün əsas stimuldur.
Nazir son illər həyata keçirilən hərtərəfli islahatlar və uğurlu dövlət quruculuğu nəticəsində Azərbaycanın dünya birliyində mövqeyinin ildən-ilə möhkəmləndiyini, hazırda geniş coğrafi və siyasi məkanda böyük nüfuza malik olduğunu bildirib. Bütün bunlar qlobal və regional xarakterli təhdidlərin artdığı şəraitdə ölkənin təhlükəsizliyi üçün məsuliyyəti daha da artırır.
Qarşıda çox böyük vəzifələr durduğunu deyən nazir qeyd edib ki, ən mühüm vəzifə işğal altında olan Azərbaycan torpaqlarının azad edilməsi və ölkəmizin ərazi bütövlüyünün təmin olunması üzrə dövlətimizin başçısının siyasi xəttinin həyata keçirilməsi işində yaxından və fəal iştirak etməkdir. Nazir vurğulayıb ki, müasir dövrdə milli maraqlarımıza qarşı yönələn təhdidlərin qarşısının alınması bizim hər birimizdən daim yüksək sayıqlıq, hərtərəfli hazırlıq və vətənpərvərlik tələb edir. Başlıca məqsəd hamının, ilk növbədə, güc strukturlarının Ali Baş Komandan İlham Əliyevin əmr və göstərişlərini dərhal yerinə yetirməyə qadir vahid, səfərbər və yenilməz qüvvə olmasıdır.
Milli Təhlükəsizlik Nazirliyinin son vaxtlar terror-təxribat fəaliyyətlərinin qarşısının alınması, narkotik vasitələrin qanunsuz dövriyyəsi, qeyri-qanuni miqrasiya, insan alveri, mütəşəkkil cinayətkarlığın digər təzahürlərinə qarşı mübarizədə ardıcıl uğurlar əldə etdiyini vurğulayan nazir qeyd edib ki, ancaq bütün bu nailiyyətlər bizi qətiyyən arxayınlaşdırmır. Əksinə daha səfərbər və ayıq-sayıq olmağa çağırır. Ümummilli lider həmişə deyirdi ki, müstəqilliyi qorumaq onu qazanmaqdan daha çətindir. Bizim amalımız müstəqilliyi və dövlətçiliyi qorumaq və möhkəmləndirməkdir. Ali məqsədimiz Azərbaycanı daha qüdrətli, vətəndaşlarımızın hüquqlarını etibarlı təmin etməkdir. Bunun üçün isə başlıca vəzifəmiz ərazi bütövlüyünün bərpasıdır, sabitliyin və təhlükəsizliyin dönməzliyini qorumaqdır.
Nazir Eldar Mahmudov Prezident, Ali Baş Komandan İlham Əliyevin bütün əmr və göstərişlərinin, tövsiyələrinin bundan sonra da dərhal və qüsursuz yerinə yetiriləcəyini bildirib və xatirələrində həmişəlik qalacaq bu gün münasibətilə gənc zabitləri bir daha təbrik edib, onlara gələcək fəaliyyətlərində uğurlar arzulayıb.
Mərasimdə Dövlət Sərhəd Xidmətinin rəisi general-leytenant Elçin Quliyev çıxış edərək ölkəmizin milli təhlükəsizliyinin və sərhədlərinin toxunulmazlığının sabahını təmin edəcək gənc zabitləri təbrik etməkdən qürur hissi keçirdiyini bildirib. General-leytenant Elçin Quliyev silahlı qüvvələrimizin tərkibinə növbəti zabit nəslinin verilməsində zəhməti və əziyyəti olan hər bir kəsə, o cümlədən Milli Təhlükəsizlik Nazirliyinin rəhbərliyinə, akademiyanın professor-müəllim heyətinə, məzunların valideynlərinə dərin minnətdarlığını bildirib. Əsası ulu öndərimiz Heydər Əliyev tərəfindən qoyulmuş ordumuzun qüdrətinin artırılması, təhlükəsizliyimizin daha da möhkəmlənməsi işində Azərbaycan Prezidenti, Silahlı Qüvvələrin Ali Baş Komandanı İlham Əliyevin gördüyü işlərdən danışan Dövlət Sərhəd Xidmətinin rəisi zabitlərin peşəkarlığının, Vətənimizə, xalqımıza, Prezidentimizə sədaqətli xidmətin bu işlərin görülməsində böyük rol oynadığını vurğulayıb.
Sonra milli təhlükəsizlik naziri Eldar Mahmudov və Dövlət Sərhəd Xidmətinin rəisi Elçin Quliyev akademiyanı fərqlənmə ilə bitirən məzunlara diplomları təqdim ediblər.
Digər zabitlərə də diplomlar təqdim olunduqdan sonra akademiyanın zabitləri və kursantları orkestrin müşayiəti ilə hərbi marşla tribunanın önündən keçiblər. Sonra tədbir akademiyadakı "Şöhrət" Muzeyində davam etdirilib. Muzeyin salonunda milli təhlükəsizlik naziri Eldar Mahmudov və Dövlət Sərhəd Xidmətinin rəisi Elçin Quliyev akademiyanı fərqlənmə ilə bitirən zabitlərə qiymətli hədiyyələr veriblər. Muzeydəki ümummilli lider Heydər Əliyevin büstünün qarşısında və akademiyanın həyətindəki ulu öndərin abidəsi önündə xatirə şəkilləri çəkdirilib.
