Bakı. Elçin Mehdiyev, Samir Əli -Trend:
Xəzərin hüquqi statusu üzrə danışıqlar mütəmadi aparılır. Növbəti görüşün yanvarın əvvəllərində Aşqabadda keçirilməsi planlaşdırılır.
Trend-in məlumatına görə, bunu Xarici işlər nazirinin müavini Xələf Xələfov jurnalistlərə deyib.
X.Xələfov bildirib ki, görüşlərdə əsas məsələlər növbəti Xəzər sammitinin keçirilməsinə hazırlıqla bağlıdır:
"Belə bir plan da var ki, İşçi Qrupu eyni zamanda, nazirlərin görüşünün keçirilməsi təşəbbüsünü irəli sürsün və bu görüş təşkil olunsun. Bütün bu tədbirlər ona yönəlib ki, sammitdə Xəzərin hüquqi statusuna aid olan konvensiya layihəsi qəbul olunsun. Yəqin ki, sammitin tarixi barəsində danışıqlar sonra aparılacaq. Nazirlərin görüşü isə yəqin ki, Astanada keçiriləcək".
X.Xələfov Azərbaycanla Türkmənistan arasında Kəpəz yatağı ilə bağlı fikir ayrılığı məsələsinə də münasibət bildirib. O qeyd edib ki, Azərbaycanla Türkmənistan arasında ikitərəfli danışıqlar forması davam etdirilir, mütəmadi məsləhətləşmələr keçirilir:
"Ancaq tam razılıq hələ əldə edilməyib".
Trend-in ən mühüm və maraqlı xəbərlərini "Telegram"da izləyin
