Bakı. Trend:
Hər zaman türk dünyasının birliyi, dərin inteqrasiyası üçün çalışan Azərbaycan eyni prinsipiallığı bu gün də sərgiləyir. Cənab Prezident İlham Əliyevin noyabrın 11-də Səmərqənddə keçirilən Türk Dövlətləri Təşkilatının IX Zirvə Görüşündəki çıxışı bunu bir daha təsdiq edir.
Bunu Trend-ə Milli Məclisin deputatı Vüqar İskəndərov deyib.
Onun sözlərinə görə, Azərbaycan Prezidentinin Səmərqənddəki çıxışında səsləndirdiyi fikirlər, əslində, TDT-nin yaxın gələcək üçün yol xəritəsi kimi dəyərləndirilə bilər.
“Çünki cənab Prezident dedi ki, türk dünyası təkcə müstəqil türk
dövlətlərindən ibarət deyil, onun coğrafi sərhədləri daha genişdir.
Dövlət başçısı bildirdi ki, Türk Dövlətləri Təşkilatının üzvləri
olan ölkələrdən kənarda yaşayan soydaşlarımızın hüquqlarının,
təhlükəsizliyinin, milli kimliyinin qorunması, onların
assimilyasiyaya uğramaması kimi məsələləri artıq təşkilat
çərçivəsində daimi əsasda diqqətdə saxlamağın vaxtı gəlib çatıb.
Hesab edirəm ki, cənab Prezident çıxışında “Türk dünyasında gənc
nəslin yaşadıqları ölkələrdə məktəblərdə öz ana dilində təhsil
almaq imkanı olmalıdır. Əfsuslar olsun ki, Azərbaycan dövlətinin
hüdudlarından kənarda yaşayan 40 milyon azərbaycanlının əksəriyyəti
bu imkanlardan məhrumdur. Türk dövlətlərindən kənarda yaşayan
soydaşlarımızın öz ana dilində təhsil almaları daim təşkilatın
gündəliyində olmalıdır. Bu istiqamətdə lazımi addımlar atılmalıdır.
Azərbaycan dövləti xarici ölkələrdə yaşayan azərbaycanlıların hüquq
və azadlığının, təhlükəsizliyinin təmin edilməsinə xüsusi diqqət
yetirir. Biz acı taleyin hökmü ilə Azərbaycan dövlətindən ayrı
düşmüş soydaşlarımızın dilimizi, ənənələrimizi, mədəniyyətimizi
qoruyub saxlamaları, azərbaycançılıq ideyalarına sadiq olmaları, öz
tarixi Vətənləri ilə əlaqələrin heç vaxt kəsilməməsi üçün
səylərimizi davam etdirəcəyik”, deməklə türk dünyasının yol
xəritəsinin əsas konturlarını göstərmiş oldu”, - deyə deputat
bildirib.
V.İskəndərov qeyd edib ki, ümumilikdə Türk Dövlətləri Təşkilatına
üzv ölkələrlə əlaqələrin bütün sahələrdə möhkəmləndirilməsi
Azərbaycanın xarici siyasətinin əsas prioritetlərindən biridir:
“Təsadüfi deyil ki, bu təşkilatın əsası da məhz Azərbaycanda, 2009-cu ildə Naxçıvan Zirvə Görüşündə qoyulub. Cənab Prezident İlham Əliyevin noyabrın 11-də Səmərqənddə keçirilən Türk Dövlətləri Təşkilatının IX Zirvə Görüşündəki çıxışında da bəyan etdiyi kimi həmin ildən başlayaraq təşkilat böyük inkişaf yolu keçib. Vurğulandığı kimi Azərbaycan həmişə 200 milyondan çox insanın yaşadığı geniş bir coğrafiyanı əhatə edən türk dünyasının sıx birləşməsinə çalışıb. Təbii ki, bu işlərin mərkəzində dayanan ən mühüm amillərdən biri də cənab Prezident İlham Əliyevin qətiyyəti, uzaqgörənliliyi, prinsipiallığı və hər zaman birliklə bağlı türk dövlətlərinə çağırışı olub”, - deyə deputat əlavə edib.