Bakı. Trend:
Qlobal Bakı Forumu aktual problemlərə toxunur və müzakirə edilir. Buna görə Nizami Gəncəvi Beynəlxalq Mərkəzinə təşəkkür edirəm.
Trend-in məlumatına görə, bunu Böyük Britaniyanın sabiq baş naziri Qordon Braun 10-cu Qlobal Bakı Forumunun panel iclası zamanı ünvanladığı videomüraciətdə deyib.
“Səhiyyə sahəsində çətinliklər hələ də qalmaqdadır. Pandemiya çox sayda ölümlərlə nəticələndi. Bunun qarşısını almaq üçün əlimizdən gələni etməliyik. Əks halda gələcəkdə daha böyük problemlərlə üzləşəcəyik. Ölkələr səhiyyəyə kifayət qədər maliyyə ayırmalıdır. Resursların səfərbər edilməsi bu problemi həll edə bilər”, - deyə o əlavə edib.
Qeyd edək ki, Azərbaycan Respublikasının Prezidenti İlham Əliyevin himayəsi altında və Nizami Gəncəvi Beynəlxalq Mərkəzinin təşkilatçılığı ilə martın 9-da “Dünya bu gün: Çağırışlar və ümidlər” mövzusunda X Qlobal Bakı Forumu işə başlayıb.
Martın 11-dək davam edəcək Forumda yeni dünya nizamına təhdid yaradan amillərə, o cümlədən təhlükəsizlik məsələsinə və sülhün təmin olunması üçün perspektivlərə, bölünmüş dünyada dayanıqlılığın qurulmasına, onun qlobal sülhə təsirinə nəzər salınacaq, qarşıda duran çağırışların həlli yolları müzakirə olunacaq, dünyanı sarsıdan münaqişələrə, meqatəhdidlərə, o cümlədən iqlim, qida və nüvə təhlükəsizliyi məsələlərinə toxunulacaq, postpandemiya dövründə görüləcək işlərlə bağlı fikir mübadiləsi aparılacaq. Həmçinin qlobal yoxsulluğun, bərabərsizliyin, iqlim böhranının və münaqişələrin simptomu kimi miqrasiyanın qarşısının alınması üçün tədbirlər əsas müzakirə mövzularından olacaq. İştirakçılar Avropanın gələcəyi ilə bağlı təsəvvürlərini bölüşəcək, populizmin və ekstremizmin mənbəyini araşdıracaq, ona qarşı səmərəli mübarizə yollarını müəyyənləşdirəcəklər.