"Kipr türkləri Şimali Kipr Türk Cümhuriyyətinin təcrid olunmasının aradan qaldırılması məsələsində göstərdiyi dəstəyə görə prezident İlham Əliyevə və Azərbaycan xalqına minnətdardır". Trend in xəbər verdiyi kimi, bu barədə avqustun 26-da Binə hava limanında ŞKTC-nin baş nazir müavini, xarici işlər naziri Sərdar Denktaş bildirib.
"Bu gün ŞKTC-dən Bakıya ilk aviareys açılıb. Bu tarixi hadisədir və mən hər birimizi bürüyən sevinc dolu hissləri sözlərlə ifadə edə bilmirəm. Bu uçuş sonuncu olmamalıdır", - deyə o bəyan edib.
Bu səfərin Kipr probleminin həllində əhəmiyyətini vurğulayan S.Denktaş qeyd edib ki, ŞKTC bu məsələnin nizama salınmasını, digər dünya dövlətlərinin də belə addım atmasını gözləyir.
Onun sözlərinə görə, Bakı-Lefkoşa aviareysi Kiprin yunan icmasını bu çoxillik problemin həlli üçün daha konstruktiv yollar tapmağa vadar edəcək.
"Bizim Bakıya səfərimizin məqsədi təcrid rejimindən tezliklə çıxmaq üçün yollar axtarmaqdır, - deyə o bildirib".
"Bilirəm ki, Azərbaycan hökumətinə ŞKTC ilə əlaqələrin kəsilməsi tələbi ilə dəfələrlə təzyiqlər göstərilib və belə cəhdlərin davam etdiriləcəyi istisna edilimir", - deyə xarici işlər naziri əlavə edib.
S.Denktaşın sözlərinə görə, üç gün davam edəcək qeyri-rəsmi səfər zamanı "Nə Türkiyə, nə də Azərbaycanın Şimali Kipr xalqını öz problemləri ilə baş-başa qoymayacağı" ilə bağlı konkret fikir səsləndiriləcək.