Noyabrın 6-da Azərbaycan prezidenti İlham Əliyev ailəsi ilə birlikdə 29 saylı Səbail dairəsinə daxil olan 6 saylı orta məktəbin seçki məntəqəsində səs verib. Trend in xəbər verdiyi kimi, dövlət başçısı səs verdikdən sonra jurnalistəlirn suallarını cavablandırıb. O bildirib ki, seçkilərin gedişindən razıdır və bütün mərhələlərdə bu prosesə hazırlıq yüksək səviyyədə və Seçki Məcəlləsinə uyğun qaydada aparılıb.
"Namizədlər üçün yaxşı və bərabər şərait yaradılmış, təşviqat kampaniyası uğurla keçirilmişdir", - deyə o qeyd edib.
Dövlət başçısı seçkilər günü vəziyyəti normal qiymətləndirib. "Mən əminəm ki, seçkilər şəffaf və ədalətli keçiriləcək və Azərbaycan xalqının iradəsi bunda öz əksini tapacaq", - deyə o bildirib.
İ.Əliyev, həmçinin, onu da əlavə edib ki, bu seçkilər Azərbaycanın gələcəyi üçün böyük əhəmiyyət daşıyır. "Hesab edirəm ki, seçkilərdən sonra ölkənin iqtisadi və digər sahələrdə inkişafı, o cümlədən demokratikləşmə prosesi daha da sürətlənəcək", - deyə o bildirib.
