Yanvarın 27-də prezident aparatında dövlət başçısı İlham Əliyevin sədrliyi ilə Bakının yol hərəkəti və nəqliyyatının hazırkı vəziyyəti və inkişafına həsr olunmuş müşavirə keçirilib. Trend bildirir ki, müşavirədə çıxış edən ölkə prezidenti respublikada nəqliyyat sisteminin inkişafı ilə bağlı tədbirlərlə yanaşı, mənfi faktları, xüsusilə Bakıda yol hərəkəti ilə bağlı yaranmış problemləri də qeyd edib.
Dövlət başçısı Azərbaycanın paytaxtında yaranmış problemlərin aradan qaldırılması üçün nəqliyyat nazirliyinə və Bakı şəhər İcra Hakimiyyətinə müvafiq tapşırıqlar verib. O, müvafiq proqramın qəbul edilməsi üçün səylərin birləşdirilməsi zərurətini qeyd edib. Dövlət başçısının fikrincə, proqramın prioritet istiqamətlərindən biri yeni yol infrastrukturunun yaradılması və mövcud avtomobil magistrallarının təmiri olmalıdır.
Ölkənin iqtisadi uğurları ilə yanaşı İ.Əliyev qeyd edib ki, son iki il ərzində ölkəyə 100 mindən çox avtomobil gətirilib. O, bu göstəricinin gələcəkdə artırılmasını qeyd edərək vurğulayıb ki, bu fakt iqtisadi münasibətlərin inkişaf səviyyəsini göstərir.
Müşavirədə AR Nəqliyyat naziri Ziya Məmmədov Bakıda yol hərəkətinin nizama salınması sahəsində aparılan tədbirlərlə bağlı məlumat verib. Bakı şəhər İcra Hakimiyyətinin başçısı Hacıbala Abutalıbov paytaxtda nəqliyyat problemlərinin aradan qaldırılması ilə bağlı aparılan tədbirlər barədə danışıb. Daxili işlər naziri Ramil Usubov rəhbərlik etdiyi qurumun yol hərəkətinin nizama salınması ilə bağlı apardığı tədbirlər barədə məlumat verib.
Sonda prezident bu vəziyyətin kompleks həlli üçün tapşırıqlar verib və proqramın yerinə yetirilməsi ilə bağlı olaraq xüsusi sərəncam imzalanacağını qeyd edib.
Trend-in ən mühüm və maraqlı xəbərlərini "Telegram"da izləyin
.jpg)
.jpg)
