Gürcüstanın münaqişələrin nizama salınması məsələləri üzrə dövlət naziri Georgi Xaindrava Azərbaycandadır və məsləhətləşmələr aparır. Bu barədə Trend ə Gürcüstanın Bakıdakı səfirliyindən məlumat verilib.
Dövlət nazirinin səfər proqramında Azərbaycanın prezident administrasiyası, Milli Məclis və Nazirlər Kabineti rəhbərliyi ilə görüşlər nəzərdə tutulub.
G.Xaindrava məshəti türklərinin işi üzrə dövlət komissiyasının sədridir və danışıqların əsas mövzusu onların Gürcüstana repatriasiyası, bunu arzu edənlərin dəqiq sayının müəyyənləşdirilməsi olacaq. Bununla əlaqədar G.Xaindravanın səfər proqramında məshəti türklərinin kompakt yaşadığı Sabirabad rayonuna baş çəkəcəyi gözlənilir.
Qeyd edək ki, Gürcüstan Avropa Şurasına daxil olduğu halda məshəti türklərinin geri qaytarılması ilə bağlı öhdəlik götürüb. Məshəti türkləri 40-cı illərdə Gürcüstanın cənub regionu Samsxe-Cavaxetidən köçürülüb. MDB məkanında onların sayı təxminən 280 mindir. Gürcüstana qayıtmaq istəyənlərin sayı təxminən 30 min nəfər təşkil edir.
Trend-in ən mühüm və maraqlı xəbərlərini "Telegram"da izləyin
.jpg)
