Azərbaycanın Avropa Şurası Parlament Assambleyasındakı (AŞPA) nümayəndə heyətinin üzvlərindən biri təşkilatın yaz sessiyasının gedişində respublikanın hərbi hissələrində insan haqlarına riayət olunması məsələsi üzrə çıxış edəcək. Bu barədə Trend ə ekskluziv olaraq parlament nümayəndə heyətinin rəhbəri Səməd Seyidov məlumat verib.
"Biz aydın şəkildə bu sahədə hər hansı bir problemin olmadığını izah edəcəyik", -deyə S.Seyidov bildirib.
2006-cı il aprelin 10-dan 13-nə kimi Strasburqda keçiriləcək AŞPA-nın yaz sessiyasının gündəliyinə təşkilata üzv olan ölkələrdə hərbi qulluqçuların hüquqlarına riayət olması üzrə məruzənin layihəsi daxildir.
AŞPA-da 10861 nömrə altındakı məruzənin müəllifi bolqar Aleksandr Arabaciyev Avropa Şurasının Nazirlər Komitəsinə AŞ-yə üzv olan ölkələrdə hakimiyyətin silahlı qüvvələrində insan haqlarına riayət olunmasına yanaşmanı nizamlayacaq qaydaların təsdiqlənməsini təklif edib. Bu qaydalar İnsan haqları üzrə Avropa Konvensiyasına əsaslanıb.