Trend in xəbər verdiyi kimi, mayın 19-da Budapeştdə Avropa Şurası Parlament Assambleyasının Monitorinq Komitəsi Azərbaycanda seçkidən sonrakı vəziyyəti müzakirə edəcək.
İclasın gündəliyində Azərbaycanla bağlı məsələ müzakirəyə çıxarılacaq 6-cı mövzu olacaq. Həmçinin, AŞPA-nın Azərbaycan üzrə həmməruzəçiləri Andres Qross və Andreas Herkelin çıxışı da gözlənilir.
Bundan başqa, mayın 13-də Azərbaycanda 10 seçki dairəsi üzrə keçirilmiş təkrar parlament seçkilərinin nəticələri və AŞPA-nın 1480 (2006) saylı qətnaməsi ilə bağlı məsələ də müzakirə olunacaq.
İclasda AŞPA-dakı Azərbaycan parlament nümayəndə heyətinin üzvləri də iştirak edəcək.
Qeyd edək ki, iclas zamanı Albaniya, Serbiya və Çernoqoriya, o cümlədən Moldovadakı vəziyyətlə bağlı fikir mübadiləsi də aparılacaq.