ATƏT-in fəaliyyətdə olan sədri, Belçikanın xarici işlər naziri Karel De Quxt bu gün bildirib ki, ATƏT dekabrın 10-da Dağlıq Qarabağda keçirilən konstitusiya layihəsi üzrə referendumu tanımır.
"Belə referendum münaqişənin həlli prosesində qeyri-konstruktiv addımdır. Həmin prosesdə, tərəflərin təsdiq etdiyi kimi, bu yaxınlarda hiss olunan dərəcədə tərəqqi əldə edilib", - deyə nazir De Quxt qeyd edib.
ATƏT Nazirlər Şurasının Brüsseldə keçirilən 14-cü toplantısında Dağlıq Qarabağ üzrə edilmiş bəyanata əsaslanaraq, o bildirib: "Biz bu cür çox şeylər vəd edən anda əldə olunmuş tərəqqini riskə məruz qoya bilən hərəkəti tanımırıq".
O, həmçinin ATƏT Minsk qrupu həmsədrlərinin bugünkü bəyanatına əsaslanaraq qeyd edib: "Bu referendumun tanınmamasının səbəbi beynəlxalq ictimaiyyətin heç bir üzvünün qondarma Dağlıq Qarabağ respublikasını müstəqil dövlət kimi tanımamasıdır".