Azərbaycan, Bakı/ Trend müxbir S.İlhamqızı/ Beynəlxalq Ana dili Günü ilə bağlı Güney Azərbaycanın Təbriz, Urmiyə, Zəncan, Sulduz və başqa şəhərlərində etiraz aksiyaları keçirilib, bir çox azərbaycanlı tələbələr 21 fevral günü dərsə getməyiblər. Bu barədə Trend ə Güney Azərbaycan Milli Oyanış Hərəkatından məlumat verilib.
Güney azərbaycanlıları öz ana dilinin rəsmi dil kimi tanınması, Azərbaycan dilində təhsil almaları tələbləri ilə küçələrə çıxıblar, yürüş və piketər keçirilib. GAMOH-dan verilən məlumata görə, bu aksiyalarla bağlı Təbriz şəhərində 100-dən çox həbs olunan var və mitinqlərin yatırılması zamanı bir neçə nəfər milli hərəkatçı yaralanıb. Zəncan şəhərində həbs olunanlardan 30 nəfərinin, Sulduzda saxlanılanlardan 20 nəfərin adları müəyyənləşdirilib.