Azərbaycan, Bakı /müxbir Trend İ.Əlizadə/Fevralın 27-də Milli Məclisin Sosial siyasət daimi komissiyasının növbəti iclası keçirilib. Deputatların müzakirəsinə "Əmək pensiyaları haqqında" qanunun tətbiqi ilə əlaqədar bəzi qanunvericilik aktlarına əlavələr və dəyişikliklər edilməsi və bəzi qanunvericilik aktlarının qüvvədən düşmüş hesab edilməsi barədə qanun layihəsi təqdim olunmuşdu.
Komissiyanın sədri Hadi Rəcəbli sənədin mahiyyəti barədə ətraflı məlumat verərək bildirib ki, "Əmək pensiyaları haqqında" qanunun Milli Məclisdə qəbulundan sonra 19 qanuna əlavə və dəyişiklik edilməsi nəzərdə tutulur ki, bunlardan 12-si sosial sahəni əhatə edir. Qeyd olunub ki, dəyişikliklərin əsas hissəsi Əmək Məcəlləsinə, "Yaşayış minimumu haqqında", "Sosial sığorta sistemində fərdi uçot haqqında", "Vətəndaşların pensiya təminatları haqqında", "Bədən tərbiyəsi və idman haqqında", "Veteranlar haqqında" qanunlarda öz əksini tapıb.
Komissiya üzvləri və mütəxəssislər bəzi texniki düzəlişlər nəzərə alınmaqla sənədin Milli Məclisin müzakirəsinə çıxarılmasını məqsədəuyğun hesab ediblər.