Azərbaycan, Bakı / Trend , müxbir İ.Əlizadə/ Milli Məclisin Sosial siyasət daimi komissiyasının cümə günü keçirilən iclasında "Azərbaycan Respublikasının bəzi qanunvericilik aktlarına əlavə və dəyişikliklər edilməsi barədə" qanun layihələri müzakirə olunub.
Bununla əlaqədar "Şəhid adının əbədiləşdirilməsi və şəhid ailələrinə edilən güzəştlər haqqında", "Çernobıl qəzasında iştirak etmiş və həmin qəza nəticəsində zərər çəkmiş vətəndaşların statusu və sosial müdafiəsi haqqında", "Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında" qanunlara, eləcə də Əmək Məcəlləsinə əlavə və dəyişikliklərin edildiyi vurğulanıb.
Dəyişikliklərdə şəhidlərə və şəhid ailələrinə xərclənən vəsaitin dövlət büdcəsindən, ayrı-ayrı imkanlı şəxslərin və müxtəlif təşkilat və müəssisələrin ianələri hesabına yaradılan yardım fondlarından ödənilməsi nəzərdə tutulur. O da qeyd olunub ki, Çernobıl qəzası nəticəsində başçısını itirmiş ailələrə minimum əmək haqqının 10 misli məbləğində, həlak olanın valideynlərinə isə minimum əmək haqqının 5 misli məbləğində birdəfəlik kompensasiya verilməsi də müvafiq dəyişikliklərdə təklif olunub.
Sonda rəy və təkliflər nəzərə alınmaqla hər iki sənədin Milli Məclisin müzakirəsinə çıxarılması barədə qərar qəbul olunub.