Azərbaycan, Bakı /müx. Trend K.Ramazanova / "Aqo" qrupunun Azərbaycan XİN-də keçirilən görüşündə Ermənistan-Azərbaycan, Dağlıq Qarabağ münaqişəsinin həlli məsələsi müzakirə olunan mövzulardan biri olub.
"Azərbaycanın xarici işlər nazirinin müavini Araz Əzimov bizə sülh danışıqları prosesində baş verən son dəyişikliklər barədə məlumat verib" -deyə missiyanın rəhbəri Per Soqren cümə günü Azərbaycan XİN-də baş tutan görüşdən sonra jurnalistlərə bildirib.
Onun sözlərinə görə, nazirin müavini həmçinin Azərbaycan və Ermənistan prezidentləri arasında iyun ayında Sankt- Peterburqda baş tutan danışıqların son mərhələsi barədə məlumat verib.
Bununla yanaşı Soqren qeyd edib ki, "Aqo" qrupunun mandatına Dağlıq Qarabağ probleminin həlli daxil deyil, qrupun mandatına Avropa Şurası qarşısında Azərbaycan və Ermənistanın götürdüyü öhdəliklərin icrasının monitorinqi daxildir.
Qobustan həbsxanasının ömürlük həbs cəzasına məhkum edilmiş 87 məhbusunun müraciətinə gəldikdə isə missiyanın gündəliyinə həbsxanaya baş çəkmək daxil deyil.