Azərbaycan, Bakı/ Trend müxbir S.Ağayeva/ Azərbaycan və Almaniya arasında energetika sahəsində əməkdaşlıq haqqında Memorandumun imzalanmasını ilin sonuna qədər gözləmək olar. Bunu Azərbaycanın Almaniyadakı səfiri Pərviz Şahbazov bildirib.
O qeyd edib ki, bu sənəd daha öncə Avropa Birliyi və ABŞ-la imzalanmış sənədin oxşarıdır.
Şahbazovun sözlərinə görə, Almaniya tərəfindən Azərbaycanla bu sahədə əməkdaşlığa kifayət qədər maraq var. Bu sahədə ilk addım Bakıda keçirilən energetka sahəsində əməkdaşlıq üzrə Alman-Azərbaycan forumu oldu.
"Məlumdur ki, Almaniya yüksək texnologiyalı ölkədir. Bütün yüksək texnologiyalar ya Almaniyada istehsal olunur, ya da orada effektiv tətbiq olunur. Bu nöqteyi-nəzərdən Almaniya Azərbaycan üçün çox mühimdir. Alman texnologiyası bizim üçün son dərəcə lazımlıdır" - deyə səfir bildirib.
Onun sözlərinə görə, Azərbaycan həmçinin Almaniyanın menecment, infrastrukturun möhkəmləndirilməsi, xüsusilə dəmir yolları, elektrik stansiyaları, mehmanxana komplekslərinin tikintisi və başqa sahələrdə olan təcrübəsinin örənilməsində maraqlıdır.