Azərbaycan, Bakı /müx. Trend E.Hüseynov, K.Ramazanova/ İyulun 23-də Bakıda Azərbaycan Diplomatik Akademiyası (ADA) tərəfindən təşkil olunan birinci beynəlxalq məktəb işə başlayıb. Avropa Universiteti İnstitutu (İtaliya) ilə birgə "Crescent beach" sahilyanı otelində keçirilən bir həftəlik tədbirə Azərbaycan, Türkiyə və Gürcüstandan 40 dinləyici toplaşıb. Bunlar əsasən XİN, dövlət orqanları və qeyri-hökumət təşkilatlarının nümayəndələridir. Forumun mövzusu "Avropa Birliyinin hüquq və siyasəti"dir. Bir həftəlik tədbirin məruzəçiləri İtaliya, İspaniya, Almaniya, Portuqaliya, Serbiya və Polşadan olan müəllimlər və ekspertlər olacaq. Həmçinin Azərbaycan xarici işlər nazirinin müavini Araz Əzimov, iqtisadi inkişaf nazirinin müavini Mikayıl Cabbarov, Azərbaycanın Avropa Şurasındakı parlament missiyasının rəhbəri Səməd Seyidov və başqaları məruzə edəcəklər. ADA-nın rektoru, xarici işlər nazirinin müavini Hafiz Paşayev açılış mərasimində qeyd edib ki, forumun məqsədi Avropa Birliyinin qanunları və siyasətini dinləyicilərin diqqətinə çatdırmaq, bu sahədə faydalı müzakirələr aparmaqdır. "Bizim akademiyada belə bir fikir mövcuddur ki, tələbələr təkcə pedaqoqlardan deyil, həmçinin özlərindən də geniş biliklər ala bilərlər. Bu səbəbdən də biz elə şərait yaradırıq ki, müxtəlif biliklərə malik insanlar öz təcrübələrini başqaları ilə bölüşə bilsinlər" - deyə Paşayev bildirib.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
